«Schudnieŭ na 10 kiłahramaŭ». Suŭładalnik architekturnaj studyi ZROBIM architects raspavioŭ pra čatyry miesiacy ŭ SIZA
Suŭładalnik architekturnaj studyi Zrobim architects Andrej Makoŭski (Andruś Bezdar) za čatyry miesiacy znachodžańnia ŭ śledčym izalatary pa kryminalnaj spravie ab padatkach malavaŭ partrety sukamiernikaŭ i architekturnyja skietčy, navučyŭsia hulać u šachmaty, padciahnuŭ anhlijskuju movu i napisaŭ knihu. Pra heta jon raspavioŭ u padkaście «ArchitekturNO», piša «Lusterka».
Andrej Makoŭski adznačyŭ, što ŭžo na treci dzień źniavoleńnia skłaŭ dla siabie śpis taho, jak možna «raźvicca ŭ hetaj situacyi». Adnym z navykaŭ, jakija architektar vyrašyŭ palepšyć, stała malavańnie partretaŭ.
— Ja namalavaŭ za hety čas vielmi šmat partretaŭ i ŭsim ich addavaŭ. Častka zamalovak u mianie zastałasia. Potym ja zaŭsiody chacieŭ malavać architekturnyja skietčy. <…> Ja pačaŭ treniravacca malavać architekturnyja skietčy, prydumlać architekturu: dla siabie novy dom, dla sukamiernikaŭ novy dom. Ja tam usim prajektavaŭ architekturu, navat tym, kamu jana nie patrebnaja, — padzialiŭsia Andrej Makoŭski.
Akramia taho, jon navučyŭsia hulać u šachmaty, pračytaŭ vosiem knih i adnu napisaŭ. Ciapier Andrej šukaje dla jaje vydaŭca.
U SIZA architektar taksama zajmaŭsia johaj, adciskaŭsia, chadziŭ pa kamiery, sačyŭ za svaim charčavańniem.
— Takim čynam schudnieŭ na 10 kh, — raspavioŭ suŭładalnik Zrobim architects.
Jon dadaŭ, što ŭ źniavoleńni vučyŭ anhlijskija słovy. Vypisvaŭ ich z knihi i adzinaj anhłamoŭnaj haziety, a zatym z dapamohaj sukamiernikaŭ pierakładaŭ. Novuju leksiku Andrej zavučvaŭ padčas svaich dvuchhadzinnych štodzionnych prahułak pa kamiery.
Jon taksama raspavioŭ, što za čas jaho źniavoleńnia z kampanii syšło 30 pracentaŭ supracoŭnikaŭ: «było 100 čałaviek, stała 70».
— Ja padumaŭ: «Kruta, 70% zastałosia». Heta ž vielmi šmat. Naohuł kłas. Heta jak patreści jabłyniu: toje, što ŭpała, jano i tak by ŭpała. Jany ŭžo saśpieli da sychodu, raz syšli, — padzialiŭsia śpikier.
Viadoŭca padkasta zajaviŭ, što «ŭ pieršyja dni hetaj historyi» byli zatrymanyja «kala 50 supracoŭnikaŭ Zrobim architects». Andrej Makoŭski raspavioŭ, što adčuvaŭ asabistuju adkaznaść za hetych ludziej.
— Ja skazaŭ, što ŭsia adkaznaść na mnie. Ja jaje pryznaju, ja raskajvajusia. Ja hatovy kampiensavać škodu. <…> Ja vinavaty, my niedapłacili padatki. Usio heta adbyłosia z-za mianie, — adznačyŭ architektar.
Andrej Makoŭski znachodziŭsia ŭ źniavoleńni z krasavika 2026 hoda. Jaho abvinavačvali ŭ atrymańni nieŭličanaha prybytku ŭ pamiery šaści miljonaŭ dalaraŭ u pieryjad z 2021 pa 2025 hod. Siłaviki pryjšli ŭ studyju paśla dopisu Makoŭskaha ŭ Threads pra toje, što im daviałosia ŭziać u štat ideołaha. U žniŭni stała viadoma, što jon vyjšaŭ na volu.
Zrobim architects — adna z najbolš viadomych i paśpiachovych architekturnych studyj Biełarusi, zasnavanaja ŭ 2011 hodzie. Kampanija pracuje jak u krainie, tak i za miažoj.