Biełarusaŭ zaprasili rabić puskanaładku na pieršaj tureckaj AES
Astravieckaje ZAT «BiełAtamSiervis» padpisała kantrakt na mantažnaje supravadžeńnie puskanaładačnych rabot na pieršym i druhim enierhabłokach atamnaj elektrastancyi «Akkuju».
Astravieckaje ZAT «BiełAtamSiervis» padpisała kantrakt na mantažnaje supravadžeńnie puskanaładačnych rabot na enierhabłokach № 1 i 2 tureckaj AES «Akkuju».
«Akkuju» staić na mižziemnamorskim bierazie kala vioski Biujukedželi ŭ pravincyi Miersin, prykładna za 120 kiłamietraŭ na zachad ad samoha Miersina i za sotniu kiłamietraŭ praz mora ad Kipra, što vyklikaje pratesty apošniaha.
Budaŭničaja placoŭka pieršaj tureckaj AES «Akkuju». Fota: Wikipedia.org
Stancyju mierylisia budavać jašče ŭ siaredzinie 1970-ch, ale Turcyja dziesiacihodździ nie mahła znajści vykanaŭcu. Abvieščany ŭ 2008‑m mižnarodny tendar praz kryzis sabraŭ adzinuju prapanovu i byŭ skasavany.
U vyniku turki damovilisia z «Rasatamam» naŭprost na asablivych umovach: Rasija buduje stancyju za svaje hrošy, a Turcyja abaviazujecca vykuplać elektraenierhiju pa fiksavanaj canie ciaham 15 hadoŭ.
Budavali «Akkuju» doŭha i ciažka. Pieršy błok zakłali jašče ŭ 2018-m, paliva pryvieźli ŭ 2023-m. Častyja źmieny padradčykaŭ vyniku pryviali da taho, što zapusk adkłaŭsia da 2026‑ha — i nie fakt, što sioleta stancyja zapracuje.
Abstalavańnie na «Akkuju» padobnaje da taho, jakoje pracuje na Astravieckaj AES. Tamu biełarusy i byli abranyja dla kantrolu za puska-naładačnymi rabotami.
Biełaruskaja dačka «Rasatama» budzie praviarać i testavać tureckija enierhabłoki ŭ roznych situacyjach pierad padklučeńniem stancyi da enierhasietki i šukać niedarobki.
Zamoŭca rabot — AT «Rasatam Siervis».
Tym nie mienš, apłata za kantrakt pryjdzie ŭ Biełaruś. Astravieckaja kampanija, u jakoj, pavodle apošniaj dakumientacyi, pracuje 25 čałaviek, atrymaje 7,5 miljona rubloŭ.