71‑hadovy biahun praciahnuŭ špica pa ziamli padčas zabiehu. Da mužčyny pryjšła milicyja
Videa vyklikała abureńnie ŭ sacyjalnych sietkach. Ciapier milicyja pravodzić pravierku.
Incydent adbyŭsia 5 vieraśnia padčas spabornictvaŭ «Chutkija łapki», jakija prachodzili pierad Minskim paŭmarafonam. Pavodle ŭmoŭ mierapryjemstva, haspadar i sabaka musili razam prabiehčy 100 mietraŭ.
Adnak paśla startavaha sihnału 71‑hadovy ŭdzielnik pabieh, a pierapałochany špic zastaŭsia na miescy. Mužčyna praciahnuŭ sabaku na pavadku pa pakryćci niekalki dziasiatkaŭ mietraŭ — zdavałasia, sabaka nie dakranaŭsia ziamli.
Videa spačatku apublikavali ŭ instahram-akaŭncie Minskaha paŭmarafonu jak žartoŭnaje. Paśla ž abureńnia ŭ kamientaryjach publikacyju vydalili, ale zapis užo razyšoŭsia pa sacyjalnych sietkach.
Milicyja znajšła haspadara sabaki i ŭziała ŭ jaho tłumačeńni. Mužčyna zapeŭniŭ, što špic nie atrymaŭ traŭmaŭ, dobra jeść i zastajecca badziory. Jon patłumačyŭ zdareńnie tak: špic spałochaŭsia rezkaha startavaha sihnału i nie pabieh, a sam mužčyna nie zaŭvažyŭ, što sabaka nie choča biehčy.
«Ja ŭžo pabieh, a jon zastaŭsia zzadu. Ja prosta nie bačyŭ, što jon nie vielmi choča biehčy, tarmazić. Ale heta było tolki ŭ pieršaj pałovie dystancyi. Druhuju pałovu jon užo zrazumieŭ, što ad jaho patrabujecca, i pabieh za mnoj», — skazaŭ biahun.
Ci budzie pakarany mužčyna za žorstkaje abychodžańnie z žyviołaj, milicyja nie paviedamiła.