Adkul machlary daviedvajucca imiony, numary i navat miescy pracy biełarusaŭ?

Machlaram zusim nie abaviazkova ŭzłomvać mienavita vaš telefon ci kampjutar. Asabistyja źviestki jany mohuć źbirać z roznych krynic.

Zdymak ilustracyjny. Fota: magnific.com

U pryvatnaści, infarmacyja moža traplać da złamyśnikaŭ praz uciečki z kampanij. Pavodle infarmacyi UUS Bresckaha abłvykankama, u Biełarusi ŭ 2026 hodzie paviedamlałasia pra ŭciečki danych, jakija zakranuli sotni tysiač karystalnikaŭ. Pryčynami mohuć być uzłom infarmacyjnych sistem, kradziež ulikovych danych, uraźlivaści prahramnaha zabieśpiačeńnia i inšyja prablemy.

Jašče adna krynica — škodnasnyja prahramy. Infastylery, abo špijonskaje prahramnaje zabieśpiačeńnie, zdolnyja kraści paroli, cookies i inšyja źviestki z kampjutara ci smartfona. Naprykład, čałaviek moža pastavić sabie prahramu, jakaja zdajecca karysnaj, ale razam ź joj atrymać škodnasnaje PZ.

Taksama złamyśniki vykarystoŭvajuć fišynh. Jany mohuć dasyłać paviedamleńni nakštałt «vaša pasyłka zatrymanaja», «paćvierdzicie asobu» abo «na vas afarmlajuć kredyt». Čałaviek pierachodzić pa spasyłcy i samastojna ŭvodzić svaje danyja na padroblenym sajcie.

Krynicaj infarmacyi stanoviacca i ŭzłamanyja akaŭnty. Kali machlar atrymlivaje dostup da elektronnaj pošty abo staronki čałavieka ŭ sacsietkach, jon moža znajści tam kantakty, pierapiski, miesca pracy, dakumienty i šmat inšych źviestak.

Akramia taho, šmat infarmacyi možna sabrać z sacyjalnych sietak i adkrytych krynic. Imia, horad, miesca pracy, svajaki, fatahrafii — usio heta možna pastupova sabrać z roznych publikacyj. Naprykład, adzin dopis pakazvaje, dzie čałaviek pracuje, druhi — kali jon pajechaŭ u adpačynak, a profil svajaka moža dać dadatkovyja źviestki.

U milicyi padkreślivajuć, što machlaru nie abaviazkova adrazu mieć poŭnaje daśje na čałavieka. Časam dastatkova niekalkich detalaŭ, sabranych z roznych krynic, kab padčas telefonnaj razmovy stvaryć uražańnie, što złamyśnik dobra viedaje svajho surazmoŭcu.

Kamientary da artykuła