18‑hadovy futbalist minskaha «Dynama» pajedzie hulać u Charvatyju

18‑hadovy biełaruski paŭabaronca Jahor Moŭčan praciahnie karjeru ŭ charvackim «Dynama» z Zahraba. Futbalist źjaŭlajecca vychavancam akademii minskaha «Dynama».

Jahor Moŭčan. Fota: Betnews.by

Z pačatku hetaha hoda Moŭčan, jakomu tady było 17 hadoŭ, treniravaŭsia razam z asnoŭnaj kamandaj minskaha «Dynama». Za hety čas jon pravioŭ 14 aficyjnych matčaŭ, zabiŭ dva miačy i addaŭ dźvie halavyja pieradačy.

13 žniŭnia futbalistu spoŭniłasia 18 hadoŭ. U hetym siezonie jon debiutavaŭ u vyšejšaj lizie Biełarusi, a taksama atrymlivaŭ vyklik u moładzievuju zbornuju krainy. Jahonaja statystyka mahła być jašče lepšaj, ale apošnija dva miesiacy siezona Mołčan prapuściŭ praz traŭmu.

Pavodle infarmacyi insajdara Anara Ibrahimava, zahrabskaje «Dynama» zapłacić za tranśfier biełarusa 110 tysiač jeŭra.

Raniej Moŭčanam taksama cikaviŭsia ispanski kłub «Levante». U śniežni 2025 hoda biełaruski futbalist prachodziŭ u hetym kłubie prahlad i stažyroŭku. Cikavaść da maładoha paŭabaroncy prajaŭlali i inšyja jeŭrapiejskija kamandy.

U apošnija hady niekalki maładych futbalistaŭ minskaha «Dynama» pierajšli ŭ zamiežnyja kłuby. Trafim Mielničenka, Uładzisłaŭ Marozaŭ i Mikita Dziemčanka pajechali hulać u Partuhaliju — adpaviedna za kłuby «Portu», «Aroka» i «Vizieła». Fiodar Łapuchoŭ apynuŭsia ŭ safijskim CSKA, a Pavieł Apiacionak — u hrečaskim PAOK z Sałonik.

Kamientary da artykuła