Usaŭ nazvaŭ dazvoł na viartańnie Pačobuta apieracyjaj uładaŭ Biełarusi
I ci paŭpłyvaŭ tut novy raŭnd pieramovaŭ z amierykancami ŭ Minsku, što nieŭzabavie maje adbycca? Pra heta ŭ efiry «Biełsatu» parazvažaŭ palitołah, siabra «Volnaj Biełarusi» Pavieł Usaŭ.
«Ja dumaju, što ŭsio, što my bačym vakoł Andžeja Pačobuta, dobra pradumanaja, nie treba ŭ hetym sumniavacca, padrychtavanaja ideałahičnaja apieracyja z boku ŭładaŭ. Jany rychtavalisia da jahonaha viartańnia, mahčyma, praduhledžvali takoje viartańnie», — skazaŭ Pavieł Usaŭ.
Usaŭ pahadžajecca, što adnym z čyńnikaŭ ščasnaha viartańnia Pačobuta na radzimu moža być vizit u Minsk pradstaŭnika ZŠA Džona Koŭła, što maje adbycca nieŭzabavie: «Heta taksama varta ŭličvać. Kaniečnie, Minsk absalutna nie zacikaŭleny ŭ abvastreńni».
Pry hetym surazmoŭca «Biełsatu» ŭpeŭnieny, što, kali b ułady bačyli ŭ pryjeździe Pačobuta pahrozu dla siabie, to prosta nie puścili b jaho, naprykład, anulavaŭšy pašpart. Choćki-niachoćki aktyvist zrabiŭsia ŭdzielnikam hulni Minsku z Varšavaj, bo jahony los biełaruski i polski baki peŭna abmiarkoŭvajuć, padkreśliŭ Usaŭ.
«Aficyjny Minsk byŭ zacikaŭleny jašče i raniej u raźvićci voś hetych kantaktaŭ farmalna-niefarmalnych z polskim bokam z metaj deeskałacyi stasunkaŭ, mahčyma, źmiakčeńnia ŭ kamunikacyjach, viartańnia niejkich placovak da dalejšych razmovaŭ. To bok my bačym kompleksny praces, jaki ŭbudoŭvajecca ahulna ŭ žadańni Minsku stvaryć niejkaj prastory dla kamunikacyi nie tolki z Varšavaj, ale taksama i ź Jeŭrasajuzam».
Pavieł Usaŭ taksama adznačyŭ, što «ilhota» dla Pačobuta, jaki svabodna zajechaŭ u Biełaruś i, padobna, praz tydzień vyjedzie, nie śviedčyć pra libieralizacyju:
«Nie dumajcie, što heta niejkaja adliha i źmiena ŭnutrypalityčnaj situacyi, ničoha radykalna i kardynalna ŭ Biełarusi nie źmianiłasia, i ŭ bližejšy čas nie źmienicca, i heta treba razumieć. Situacyja Pačobuta — zusim inšaja. Heta postać viadomaja, viartańnie jakoha prapahanda i inšyja instytuty łukašenkaŭskaj ułady buduć vykarystoŭvać u prasoŭvańni svaich naratyvaŭ. Na losach prostych ludziej heta nijak, na žal, nie adabjecca».
Zakliki da biełarusaŭ viartacca na radzimu sa spasyłkaju na historyju Pačobuta — manipulacyja, bo represii ŭ krainie nie spyniajucca. Adzinaje, što tut moža spracavać, — amnistyja i zakryćcio ŭsich kryminalnych spravaŭ, zaviedzienych u źviazku z padziejami 2020—2022 hadoŭ, zajaviŭ Usaŭ.
Tady, pavodle jaho, šmat biełarusaŭ viarnułasia b, adnak ciapier «nijakich umovaŭ dla viartańnia nie isnuje i ŭ bližejšy čas isnavać nie budzie».