Tramp pavinšavaŭ AdH ź pieramohaj na vybarach u Saksonii-Anchalt
«Vaŭ, u papulisckaj partyi ŭ Hiermanii była sapraŭdy paśpiachovaja noč».
Fota: Win McNamee/Getty Images
Prezident ZŠA Donald Tramp pavinšavaŭ krajnie pravuju partyju «Alternatyva dla Hiermanii» (AdH) ź pieramohaj na vybarach u łandtah Saksonii-Anchalt, jakija adbylisia 6 vieraśnia, i vykazaŭ mierkavańnie, što partyja znachodzicca «na ŭzdymie», piša DW.
«Vaŭ, u papulisckaj partyi ŭ Hiermanii była sapraŭdy paśpiachovaja noč», — napisaŭ Tramp na svajoj płatformie Truth Social u sieradu, 9 vieraśnia.
Amierykanski prezident nie nazvaŭ AdH niepasredna, ale ź jaho paviedamleńnia jasna, što havorka idzie mienavita pra jaje. Tramp vykazaŭ mierkavańnie, što AdH i jaje prychilniki stamilisia ad «absalutna žachlivych praviłaŭ u śfiery imihracyi». «Jany znachodziacca na ŭzdymie i bolš nie buduć hetaha ciarpieć», — napisaŭ prezident ZŠA.
U kancy publikacyi Tramp vykarystaŭ skaračeńnie «MGGA!!!», jakoje, mierkavana, aznačaje «Make Germany Great Again» — «Zrobim Hiermaniju znoŭ vialikaj». Heta adsyłka da jaho łozunha «Make America Great Again» i skaračeńnia MAGA.
U noč vybaraŭ Tramp apublikavaŭ u Truth Social skrynšot papiarednich vynikaŭ vybaraŭ u łandtah Saksonii-Anchalt. Na hrafiku było pakazana lidarstva AdH, ale Tramp nie dapoŭniŭ publikacyju kamientarom.