26‑hadovaha hamielčuka asudzili na 5,5 hoda kałonii za «paklop i źniavahu Łukašenki»

Maćvieja Baranava abvinavacili adrazu pavodle piaci palityčnych artykułaŭ i ŭnieśli ŭ śpis «terarystaŭ».

Maćviej Baranaŭ. Fota z sacsietak

Maćvieju Baranavu 26 hadoŭ, jon z Homiela. U 2018 hodzie chłopiec pastupiŭ u Homielski dziaržaŭny techničny ŭniviersitet imia Suchoha na śpiecyjalnaść «Infarmacyjnyja technałohii i kiravańnie ŭ techničnych sistemach» i paśpiachova jaho skončyŭ. Dzie jon pracavaŭ dalej, my adšukać nie zmahli.

Chłopca zatrymali 10 vieraśnia 2025 hoda. Homielski abłasny sud razhladaŭ spravu pavodle cełaha šerahu kryminalnych artykułaŭ: č. 1 art. 368 («źniavaha Łukašenki»), č. 1 i č. 2 art. 367 («paklop na Łukašenku»), art. 369‑1 («dyskredytacyja Biełarusi»), č. 3 art. 361 («zakliki da dziejańniaŭ suprać nacbiaśpieki»), a taksama č. 1 i č. 2 art. 361‑4 («sadziejničańnie ekstremicskaj dziejnaści»).

Sud pryznačyŭ Baranavu 5 hadoŭ i 6 miesiacaŭ pazbaŭleńnia voli va ŭmovach uzmocnienaha režymu. Palitviaźnia ŭnieśli ŭ śpis asob, «datyčnych da terarystyčnaj dziejnaści», praz što ŭ źniavoleńni jamu zabłakavali hrašovyja pieravody.

Ciapier chłopiec adbyvaje termin u papraŭčaj kałonii №22 («Voŭčyja nory») u Bresckaj vobłaści.

Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ. 

«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy. 

Kamientary da artykuła