Mahiloŭskija dziaržbłohiery nie padzialili karobku ź pirožnymi. U ich vajnie raźbirałasia milicyja
U Mahilovie kamanda ź dziaržaŭnych žurnalistaŭ i błohieraŭ zaniała treciaje miesca ŭ patryjatyčnym kvizie, nie padzialiła 36 pirožnych i źviarnułasia ŭ milicyju.
Praŭładnyja mahiloŭskija błohiery pasvarylisia za karobku ź pirožnymi. Daviałosia raźbiracca milicyi. Kałaž: «Naša Niva»
Hałoŭnyja hieroi hetaj epapiei — karespandent dziaržaŭnych «Mahiloŭskich viedamaściaŭ» i praŭładny błohier Siarhiej Łosieŭ, a taksama mahiloŭskaja błohierka Julija Edziryvira Aračyhie, viadomaja ŭ instahramie jak jula_hoola.
Jany pasvarylisia jašče 7 maja. Ich kamanda zaniała treciaje miesca ŭ kvizie i atrymała skrynku z 36 pirožnymi. Julii i jaje siabroŭcy dastalisia čatyry. Astatnija 32 zabraŭ Łosieŭ, jak jon tłumačyć, kab na nastupny dzień pačastavać kaleh u redakcyi.
Zdavałasia b, navat pavodle samych składanych praviłaŭ matematyki tut možna było niejak damovicca. Ale baki abrali inšy šlach.
Spačatku była Vialikaja Pieramoha. Potym — vajna za pirožnyja
7 maja supracoŭniki infarmahienctva «Mahiloŭskija viedamaści» pryjšli ŭ handlovy centr «Atryum» na kviz, pryśviečany Druhoj suśvietnaj vajnie. Razam ź imi hulali dźvie mahiloŭskija błohierki — Julija i jaje siabroŭka Nasta.
Łosieŭ śćviardžaje, što błohierki prosta pryjšli da ich stała sa słovami: «My budziem hulać z vami». Nichto ich nibyta nie zaprašaŭ, ale žurnalisty vyrašyli nie admaŭlać: bolš ludziej — bolš šancaŭ znajści pravilnyja adkazy.
Julija ŭ svaju čarhu kaža, što bolš za hod supracoŭničała z «Mahiloŭskimi viedamaściami». Redakcyja zaprašała błohieraŭ na haradskija mierapryjemstvy, a tyja zdymali roliki i dapamahali prasoŭvać staronki dziaržaŭnaha vydańnia. Afišu kviza, pavodle jaje, dasłali ŭ ahulny čat «Błohiery + ŚMI», tamu jana nie padazravała, što pryjšła tudy biez zaprašeńnia.
Kamanda zaniała treciaje miesca i atrymała ŭ padarunak karobku z 36 pirožnymi. Mienavita ŭ hety momant histaryčnaja viktaryna skončyłasia i pačałasia sapraŭdnaja bitva, užo nie za pamiać, a za desiert.
Šaurma jak test na patryjatyzm
Viersija Łosieva vyhladaje amal jak maralnaja prytča. Pavodle jaho, Julija nie adkazała ni na adno z 49 pytańniaŭ, nie viedaje, kali pačałasia Vialikaja Ajčynnaja vajna, sprabavała huhlić adkazy, a ŭ razhar kviza pajšła pa šaurmu. Pryčym nie prosta pa šaurmu, a, jak padkreślivaje błohier, pa «karyta» šaurmy ŭ kantejniery.
«Pasiarod patryjatyčnaha kviza, dzie ludzi ŭzhadvajuć svaju historyju, hierojaŭ Savieckaha Sajuza, dziaciej, partyzanaŭ, pijanieraŭ-hierojaŭ, jana kaža: «Pajdu vaźmu šaurmu», — aburajecca jon.
Padčas kviza, kaža Łosieŭ, jaho niekalki razoŭ naviedaŭ «ispanski soram». Spačatku kali Julija nibyta huhliła. Potym — kali pajšła pajeści. Narešcie — kali zachacieła atrymać svaju častku ahulnaha pryza.
Tak 36 pirožnych stali ŭznaharodaj, prava na jakuju, pavodle łohiki Łosieva, treba było zasłužyć pravilnymi adkazami i naležnymi pavodzinami.
«Na kolki pytańniaŭ adkazała, stolki pirožnych i biary», — pierakazvaje jon svaju prapanovu.
Kali vieryć Łosievu, adkazaŭ Julii było «nul». Takim čynam, čatyry pirožnyja, jakija jana ŭsio ž atrymała, možna ličyć nadzvyčaj ščodrym bonusam.
«Voś usio, što jon nam daŭ»
Julija apisvaje padziei značna praściej. Jana ličyła pirožnyja supolnym pryzam kamandy i chacieła zabrać častku dla siabie i siabroŭki. Na videa, źniatym adrazu paśla kanfliktu, jana pakazała čatyry pirožnyja:
«Vy pahladzicie, što robić Siarhiej. Heta prosta hańba. My vyjhrali cełuju karobku ŭsie razam. Voś usio, što jon daŭ nam z Nastaj».
Pavodle Julii, jana paśpieła ŭziać niekalki štuk, paśla čaho Łosieŭ vypichnuŭ jaje ruki, zakryŭ skrynku i pajšoŭ. Łosieŭ užyvańnie siły admaŭlaje. Jon kaža, što błohierka brała adno pirožnaje za druhim i nie źbirałasia spyniacca, tamu jon prosta zakryŭ skrynku.
Astatnija 32 pirožnyja Łosieŭ panios u redakcyju. Pavodle jaho, tak było damoŭlena zahadzia: na nastupny dzień usie pavinny byli sabracca ŭ «Mahiloŭskich viedamaściach», papić harbaty i zaadno razabrać pamyłki ŭ kvizie.
Praŭda, Julija tudy ŭžo nie pryjšła. Zatoje pirožnyja «pryjšli» i, jak paźniej aficyjna vyznačyła milicyja, byli źjedzienyja supracoŭnikami redakcyi.
Pirožnyja skončylisia, vajna praciahnułasia
Rolik Julii pra situacyju raźlacieŭsia pa sacyjalnych sietkach.
Pavodle błohierki, paśla joj patelefanavali z abłvykankama. Tam nibyta zajavili, što razumiejuć jaje, ale paprasili vydalić videa, kab skandał nie ŭdaryŭ pa ŭsioj redakcyi. Julija schavała rolik, ale kanflikt na hetym nie skončyŭsia. Jana śćviardžaje, što napiaredadni 9 Maja ŭ čacie błohieraŭ zaprasili dałučycca da śviatočnaha parada. Jana pryjechała razam ź siabroŭkaj Nastaj i raźličvała, što znajomyja supracoŭniki ŚMI, jak i raniej, dapamohuć im prajści ŭ kałonu. Adnak adny nie adkazvali na zvanki, a inšyja kazali, što ničoha nie viedajuć. U vyniku dziaŭčaty zdymali parad z boku hledačoŭ.
Łosieŭ u svaju čarhu zajaviŭ, što suprać jaho arhanizavali ataku botaŭ, pryčym tyja nibyta metanakiravana pisali pad patryjatyčnymi publikacyjami pra 9 Maja, «Słavianski bazar» i «Kupalle» ŭ Aleksandryi.
Pakidać spravu bieź dziaržaŭnaha reahavańnia błohier nie staŭ. Jon źviarnuŭsia ŭ Leninski RAUS Mahilova i paprasiŭ pryciahnuć Juliju da kryminalnaj adkaznaści za paklop. Pačałasia pravierka. Tak sprečka, jakuju sam Łosieŭ nazyvaŭ «dziciačym sadkom, jasielnaj hrupaj», dajšła da kabinieta ŭčastkovaha inśpiektara. Milicyi daviałosia vyśviatlać skład kamandy, kolkaść pirožnych i toje, chto kudy panios skrynku paśla kvizu.
Milicyja asnoŭny fakt z rolika Julii paćvierdziła: z pryza joj i Naście dastalisia čatyry pirožnyja, a astatnija 32 Łosieŭ panios u redakcyju.
28 žniŭnia Leninski RAUS admoviŭ u zaviadzieńni kryminalnaj spravy, bo ŭ dziejańniach Julii nie znajšli składu paklopu. Milicyja pryjšła da vysnovy, što jana nie raspaŭsiudžvała zaviedama łžyvyja źviestki, a vykazała ŭ instahramie ŭłasnaje mierkavańnie pra pavodziny Łosieva.
Hieroi historyi — chto jany
Siarhiej Łosieŭ — karespandent dziaržaŭnaha infarmahienctva «Mahiloŭskija viedamaści» i aŭtar błoha LosevTV. Jon zdymaje haradskija padziei, ahladaje ježu i stałovyja, jeździć na dziaržaŭnyja śviaty i praŭładnyja mierapryjemstvy.
Sam jon nazyvaje siabie aŭtaram błoha «Jesť čio pojesť». Łosieŭ udzielničaŭ u dziaržaŭnaj «Fabrycy błohieraŭ» i forumach błohieraŭ, raskazvaŭ pra «Dažynki», «Słavianski bazar», śviatkavańnie 9 Maja, «Kupalle» ŭ Aleksandryi i inšyja aficyjnyja padziei.
Julija viadzie staronku jula_hoola i nazyvaje siabie «niazručnaj błohierkaj», ryłśmiejkierkaj i fatohrafkaj z Mahilova. Jana publikuje asabistyja historyi, zdymaje haradskija mierapryjemstvy, robić rekłamny kantent i raskazvaje pra kanflikty, u jakija traplaje.