U 22 hady pamierła pieramožca apošniaha konkursu «Mis Aŭstryja». Jana pieraniesła 7 apieracyj na sercy

«Mis Aŭstryja» Lusija Sisič pamierła ŭ 22 hady. Pra jaje śmierć paviedamiła arhanizacyja Mission Austria, jakaja ładzić nacyjanalny konkurs pryhažości. 

Lusija Sisič

Arhanizatary konkursu nazvali Lusiju «cudoŭnaj maładoj žančynaj» i vykazali spačuvańni jaje siamji, siabram i blizkim.

Viadoma, što Sisič z naradžeńnia mieła prablemy z kłapanami serca i nieadnarazova adkryta raskazvała pra svajo zdaroŭje. Pieršuju apieracyju na adkrytym sercy joj zrabili nieŭzabavie paśla naradžeńnia. Da 2024 hoda jana pieraniesła piać apieracyj.

Asabliva ciažkim staŭ 2017 hod, kali padčas apieracyi 13‑hadovuju Lusiju daviałosia reanimavać. Paśla ŭskładnieńniaŭ jana kala piaci miesiacaŭ znachodziłasia ŭ balnicy i znoŭ vučyłasia chadzić. Adnak niama paćvierdžańnia, što mienavita zachvorvańnie serca stała niepasrednaj pryčynaj jaje śmierci.

Letam 2025 hoda Sisič pieraniesła šostuju surjoznuju apieracyju. Pavodle jaje słoŭ, umiašańnie spatrebiłasia terminova praź infiekcyju. U vieraśni taho ž hoda joj zrabili siomuju apieracyju na sercy.

Paśla apošniaha ŭmiašańnia Lusija kazała, što vielmi ščaślivaja i spadziajecca na niekalki hadoŭ zrabić pierapynak u lačeńni. Jana taksama chacieła dapamahać dzieciam, jakija sutyknulisia z padobnymi prablemami sa zdaroŭjem.

U studzieni 2024 hoda ŭradženka Vieny atrymała tytuł «Mis Viena». 10 vieraśnia taho ž hoda jana pieramahła ŭ finale konkursu «Mis Aŭstryja», jaki prachodziŭ padčas Vienna Fashion Week. Na toj momant joj było 20 hadoŭ. Sisič vučyłasia na vykładčycu i zajmałasia padtrymkaj ludziej z zachvorvańniami serca.

Paśla konkursu 2024 hoda novy nacyjanalny konkurs nie pravodziŭsia, tamu Lusija Sisič zastavałasia dziejnaj «Mis Aŭstryja» da svajoj śmierci.

Apošniuju publikacyju ŭ Instagram jana raźmiaściła 12 žniŭnia. Na apublikavanych fotazdymkach dziaŭčyna paziravała ŭ załatoj sukiency.

Kamientary da artykuła