«Skazaŭ tavaryšu: «Ja sam dam rady». Futbalist, jaki vyratavaŭ žančynu, raskazaŭ, jak usio adbyłosia
Kirył Niechin, što hulaje ŭ kłubie druhoj lihi «Ahra-Pielišča», uletku vyratavaŭ čałavieka, što tanuŭ. Kirył adpačyvaŭ na plažy ŭ Breście, kali zdaryłasia heta historyja.
Chłopiec biez vahańniaŭ kinuŭsia ŭ vadu, kab vyratavać čałavieka. Jon raskazaŭ u intervju Betnews pra abstaviny historyi.
«My sabralisia nočču kampanijaj na Krasnym Dvary (pryharad Bresta). Nas było čałaviek 15. Pad ranicu my ź niekatorymi siabrami vyrašyli pasiadzieć na ležakach, jakija znachodzilisia kala bieraha. Tam my paznajomilisia ź inšaj kampanijaj, jakaja adpačyvała pobač. Siadzieli, kłasna razmaŭlali, usio było dobra. A potym žančyna z toj druhoj kampanii vyrašyła papłavać u voziery. Płyvie, płyvie i sama nie zaŭvažyła, jak adpłyła mietraŭ na 50 ad bieraha… I ja ŭžo zrazumieŭ, što sama jana adtul nie vybieracca: jaje pačało kidać — hałava to pad vadoj, to nad vadoj. I ničoha nie zastavałasia, jak chutka płyć i ratavać čałavieka. Uvohule nie dumaŭ, što kali-niebudź apynusia ŭ padobnaj situacyi», — kaža Kirył.
Kirył nie tolki futbalist, ale i nastaŭnik fizkultury ŭ škole, płavać navučyŭsia ŭ škole. vučyli płavańniu va ŭniviersitecie na fakultecie fizičnaha vychavańnia.
Jon kaža, što spačatku papłyŭ nie jon, a jaho znajomy Ihar, jaki pieršy heta ŭbačyŭ.
«Jon pa ciełaskładzie taki chudzieńki, i jamu samomu było ciažka. A śledam płyŭ ja. Ja Iharu skazaŭ: «Płyvi na bierah, ja sam dam rady», — zaznačyŭ chłopiec.
Kirył adznačaje, što svajaki nie čakali ad jaho takoha samaaddanaha ŭčynku, ale sam siabie hierojem nie adčuvaje.
Jaho kamanda «Ahra-Pielišča» hulaje ŭ Kamiancy — u druhoj lizie čempijanatu Biełarusi. Zaraz vyjšła ŭ druhi etap i sprabuje pazmahacca za pavyšeńnie ŭ kłasie.
«Žychary Kamianca [na matčy] prychodziać, z Bresta ludzi pryjazdžajuć. Plus siemji futbalistaŭ. Kali my hulajem na štučnym poli, to ŭ siarednim prychodzić pa 50 čałaviek. Kali na naturalnym — čałaviek 120», — kaža jon.
Asnoŭnaja jaho praca — nastaŭnik fizkultury ŭ škole.
«Bulinhu niama. U mianie ŭroki prachodziać pry dyscyplinie. Dzieci viedajuć, čaho ja ad ich chaču, i heta vykonvajuć. Usim usio padabajecca. Daloka nie ŭsie viedajuć, što ja hulaŭ u «Ruchu», byŭ kapitanam dubla «Dynama» Brest. Ale jość i tyja, chto viedaje, cikavicca tym ža FK «Ahra-Pielišča. Pytajucca parady. Dla tych, chto viedaje, — napeŭna, kruta, što ja futbalist», — zaznačyŭ Kirył.
— Što vučni skazali, daviedaŭšysia pra vaš hieraičny ŭčynak?
— Skazali: «Kirył Dźmitryjevič, vy, viadoma, małajčyna». Mnie pryjemna.