Ispanija budzie razdavać hramadzianstva žycharam svajoj byłoj afrykanskaj kałonii

Parłamient Ispanii ŭchvaliŭ zakon, jaki dazvolić dziasiatkam tysiač vychadcaŭ z Zachodniaj Sachary atrymać ispanskaje hramadzianstva. Havorka idzie pra ludziej, jakija naradzilisia ŭ časy, kali hetaja sprečnaja terytoryja znachodziłasia pad kiravańniem Ispanii, piša Euronews.

Zdymak ilustracyjny. Fota: Billel Bensalem/APP/NurPhoto via Getty Images

Zhodna z zakonam, hramadzianstva praz naturalizacyju zmohuć atrymać sachravi, narodžanyja da 29 vieraśnia 1977 hoda, a taksama ich dzieci. Mienavita hetaja data ličycca faktyčnym zaviaršeńniem pracesu dekałanizacyi Zachodniaj Sachary. Prava na atrymańnie hramadzianstva budzie dziejničać i dla tych, chto nie maje zakonnaha statusu pražyvańnia ŭ Ispanii.

Dakładnaja kolkaść patencyjnych atrymalnikaŭ ispanskaha hramadzianstva nieviadomaja. Pavodle acenak, pad kryteryi zakona padpadajuć kala 80 tysiač sachravi, a z ulikam ich naščadkaŭ kolkaść moža dasiahać amal 200 tysiač čałaviek.

Za zakon prahałasavali 168 deputataŭ, suprać — 31. Narodnaja partyja, hałoŭnaja pravacentrysckaja apazicyjnaja siła, ustrymałasia, a ultrapravaja Vox vystupiła suprać. Partyja Junts, jakaja padtrymlivaje niezaležnaść Katałonii, taksama ŭstrymałasia. Raniej hetyja siły padtrymlivali zakonaprajekt na pačatkovych etapach, kali kiroŭnaja Sacyjalistyčnaja partyja jašče nie navažvałasia aktyŭna jaho prasoŭvać.

Ciapier zakon pavinien razhledzieć Sienat. Paśla kančatkovaha zaćviardžeńnia i aficyjnaj publikacyi pretendenty atrymajuć try hady dla padačy zajavy na hramadzianstva.

Kab paćvierdzić prava na jaho atrymańnie, zajaŭniki pavinny buduć padać dakumient, jaki paćviardžaje ich status. Heta moža być paśviedčańnie asoby, zapis u pierapisie nasielnictva, praviedzienym pad kantrolem AAN padčas padrychtoŭki da tak i nie praviedzienaha refierendumu ab statusie Zachodniaj Sachary, albo paśviedčańnie ab naradžeńni. Dapuskajucca taksama inšyja dakumienty — školnyja atestaty, papiery ab pryznačeńni piensii, ispanskija pravy na kiravańnie aŭto, miedycynskija karty i vypiski z balnic.

Inicyjataram prasoŭvańnia zakonaprajekta stała partyja Sumar, małodšy partnior u ispanskaj kiroŭnaj kaalicyi. Adnym ź jaje pradstaŭnikoŭ źjaŭlajecca inžynierka Teš Sidy, jakaja sama naradziłasia ŭ łahiery sachravijskich biežancaŭ u Tyndufie ŭ Ałžyry.

Pavodle jaje słoŭ, zakon pavinien vypravić histaryčnuju niespraviadlivaść. Pry lehalnym pražyvańni ŭ Ispanii termin pracedury prapanujecca skaracić da dvuch hadoŭ. Raniej sachravi mahli čakać 10, 14 i navat 24 hady, pierš čym atrymać mahčymaść padać zajavu na ispanskaje hramadzianstva, u tym liku ŭ vypadkach, kali ich baćka byŭ ispancam.

Pryniaćcie zakona moža mieć i dypłamatyčnyja nastupstvy dla adnosin Ispanii z Maroka. Z 1975 hoda bolšaja častka Zachodniaj Sachary kantralujecca Maroka, adnak AAN praciahvaje ličyć jaje niesamakiravanaj terytoryjaj.

Na praciahu mnohich hadoŭ dla Ispanii składanaj prablemaj byŭ kanflikt pamiž Maroka i Frontam PALISARYA, jaki padtrymlivajecca Ałžyram i vystupaje za niezaležnaść Zachodniaj Sachary. Adnak u 2022 hodzie Madryd adyšoŭ ad svajoj tradycyjnaj pazicyi niejtralitetu i padtrymaŭ prapanavany Maroka płan nadańnia hetaj byłoj ispanskaj kałonii aŭtanomii. Heta stała častkaj pracesu palapšeńnia ispana-marakanskich adnosin.

Palityka Ispanii ŭ dačynieńni da Maroka pry hetym zastajecca pradmietam vostraj krytyki. Asabliva heta prajaviłasia paśla biesprecedentnaha niadaŭniaha napłyvu dziasiatkaŭ tysiač mihrantaŭ z Maroka ŭ ispanskuju Sieutu. Ispanski ŭrad ustrymlivajecca ad pramych abvinavačańniaŭ Maroka, jakoje pretenduje na suvierenitet nad afrykanskimi ekskłavami Sieutaj i Mieliljaj, tady jak pravyja palityčnyja siły Ispanii śćviardžajuć, što Rabat vykarystaŭ mihracyjny napłyŭ u palityčnych metach.

Na hetym fonie rašeńnie ab hramadzianstvie dla žycharoŭ Zachodniaj Sachary vyklikała nieadnaznačnuju reakcyju ŭ Maroka, ale aficyjny ŭrad krainy pakul nie vystupiŭ z asudžeńniem hetaj inicyjatyvy.

Kamientary da artykuła