Kušnier: Kali b Ukraina zachacieła pajści na sastupki ŭ terytaryjalnym pytańni, u nas užo było b pahadnieńnie
Zadaču pasiarednikaŭ jon bačyć u tym, kab znajści kreatyŭnaje rašeńnie, jakoje zadavolić abodva baki.
Vizit Styva Uitkafa i Džareda Kušniera ŭ Kijevie 6 vieraśnia. Fota: «RBK-Ukraina»
Śpiecyjalny pasłańnik prezidenta ZŠA Džared Kušnier zajaviŭ, što dla zaklučeńnia pahadnieńnia ab spynieńni vajny nie staje zhody Ukrainy admovicca ad svaich terytoryj u miežach, patrabavanych Uładzimiram Pucinym, paviedamlaje «Ukrainskaja praŭda».
«Prezident Pucin akreśliŭ svaju pazicyju nakont taho, čaho jon choča dabicca. Kali b Ukraina zachacieła pajści na sastupki ŭ hetym pytańni, my b užo ŭzhadnili astatnija punkty pahadnieńnia. Ale Ukraina zaraz nie choča hetaha rabić. I naša rabota jak pasiarednikaŭ u tym, kab znajści kreatyŭnaje rašeńnie, jakoje nie budzie piarečyć ich [Ukrainy] žadańniam, dapamoža dasiahnuć mety i pry hetym prymusić Rasiju zakončyć kanflikt tak, kab abodva baki zmahli ruchacca napierad u miežach sistemy, jakaja vyklučyć paŭtareńnie padobnaha», — skazaŭ Kušnier padčas štohadovaha forumu YES u Kijevie 12 vieraśnia.
Kušnier taksama zajaviŭ, što zadača pasiarednikaŭ u pošuku «kreatyŭnaha rašeńnia», jakoje dazvolić zamarozić kanflikt. Pry hetym jon ličyć, što terytaryjalnaje pytańnie pavinna vyrašacca z ulikam situacyi na poli boju.
U svaim vystupie pradstaŭnik prezidenta ZŠA kazaŭ, što i Kijeŭ, i Maskva byccam by adčuvajuć «vialiki bol» i majuć «ćviordy namier» zaviaršyć vajnu.
«Prynamsi zaraz jany [rasijanie] havorać pravilnyja rečy — što chočuć abmierkavać sposab niejak heta vyrašyć. Prezident Zialenski, miarkujučy pa tym, što my bačyli, maje rašučy namier. I miarkujučy pa tym, što my čuli, prezident Pucin taksama da hetaha imkniecca. Nam prosta treba znajści pravilnuju formułu, jakaja zadavolić usich».
Kušnier prapanavaŭ zasiarodzicca na biznes-intaresach i «ekanamičnym roskvicie» paśla zakančeńnia bajavych dziejańniaŭ.
Pakazalna, što jakraz padčas razvažańniaŭ Kušniera ab hatoŭnaści Pucina da realnych mirnych pieramoŭ u Kijevie prahučaŭ sihnał pavietranaj tryvohi z-za čarhovaj rasijskaj ataki.
Adkazvajučy na pytańnie, jak časta jon płanuje naviedvać Kijeŭ, kab prademanstravać padtrymku i paspryjać chacia b časovamu spynieńniu pavietranych udaraŭ, Kušnier zajaviŭ, što addaje pieravahu addalenaj pracy.
«My nie prychilniki pakaznoj dypłamatyi. My robim toje, što treba, pa telefonie ci praz Zoom… Ja b chacieŭ pryjechać tady, kali nastupić mir».