Rasijanie znoŭ skuplajuć aŭto ŭ Biełarusi. Ale ad BMW davodzicca admaŭlacca
Biaruć tannyja mašyny da 3,5 tysiačy dalaraŭ dla kiroŭcaŭ-pačatkoŭcaŭ i dyzielnyja aŭtamabili — na fonie deficytu bienzinu ŭ Rasii.
Paśla niekalkich padvyšeńniaŭ utylizacyjnaha zboru ŭ 2024—2025 hadach uvoz aŭto ŭ Rasiju ź Biełarusi staŭ niavyhadnym, ale letam 2026 hoda cikavaść rasijan da hetaha kanału adradziłasia, piša «Hazieta.Ru».
Popyt dzielicca na dźvie płyni. Kuplajuć tannyja mašyny da 3,5 tysiačy dalaraŭ dla kiroŭcaŭ-pačatkoŭcaŭ i dyzielnyja aŭtamabili — na fonie deficytu bienzinu ŭ Rasii, pakolki dyzpaliva na AZS zakančvałasia radziej.
Z 1 śniežnia 2025 hoda dziejničajuć novyja patrabavańni dla ilhotnaj staŭki utylsboru: mahutnaść ruchavika nie vyšejšaja za 160 k.s. i poŭny kamplekt mytnych dakumientaŭ.
Praz heta zamiest raniej papularnych BMW ciapier biaruć Peugeot, Renault, Opel i niedarahija krasoviery nakštałt Chevrolet Trax i Buick Encore.
U Biełarusi vybar dyzielnych aŭto šyrejšy, a va ŭładalnikaŭ čaściej zachavany aryhinały mytnych dakumientaŭ, što spraščaje lehalizacyju ŭ Rasii. Rasijskija aŭtapadborščyki adznačajuć: takija mašyny ciapier raskuplajuć za niekalki dzion paśla publikacyi abjavy.
Jašče adna katehoryja pakupnikoŭ — uładalniki pražerlivych abo patrabavalnych da jakaści paliva inšamarak. Z-za źjaŭleńnia na rasijskich AZS paliva kłasa «Jeŭra-2» ludzi pierasadžvajucca na bolš niepieraborlivyja i ekanamičnyja mašyny.
Aŭtamatyčnaj vyhady bolš niama — treba zakładvać vydatki na paśviedčańnie ab biaśpiecy kanstrukcyi transpartnaha srodku. (kala 300 dalaraŭ) i pasłuhi aŭtapadborščykaŭ z dastaŭkaj (kala 800 dalaraŭ). Ale ŭ asobnych vypadkach vyhada ŭsio roŭna vialikaja: naprykład, Chevrolet Trax 2019 hoda z prabieham 30 tys. km kupili za 15,5 tysiačy dalaraŭ, tady jak u Rasii padobnaje aŭto (užo sa skručanym prabieham) pradavałasia za 21,5 tysiačy.