Tramp zapatrabavaŭ ad Zialenskaha spynić źniščeńnie rasijskich NPZ z-za pahrozy suśvietnaha deficytu paliva
Prezident ZŠA publična zaklikaŭ ukrainskaje kiraŭnictva admovicca ad napadaŭ na naftapierapracoŭčuju infrastrukturu Rasii. Tramp upeŭnieny, što mienavita hetyja ŭdary, a nie napružanaść u inšych rehijonach śvietu, pravakujuć hłabalny niedachop dyzielnaha paliva i bjuć pa suśvietnaj enierhietyčnaj stabilnaści.
Donald Tramp. Fota: AP Photo / Alex Brandon
Padčas niadzielnaj razmovy z žurnalistami 13 vieraśnia amierykanski lidar padkreśliŭ, što mienavita dziejańni Ukrainy stvarajuć prablemy z pastaŭkami naftapraduktaŭ. Jak paviedamlaje ŭkrainski 24 Kanał sa spasyłkaj na Clash Report, Tramp zajaviŭ, što Uładzimir Zialenski pavinien zrabić adnu reč — spynić źniščeńnie dyzielnaha paliva ŭ Rasii.
Prezident ZŠA asobna adznačyŭ, što kryzis vyklikany vyklučna rasijska-ŭkrainskaj vajnoj, a nie situacyjaj na Blizkim Uschodzie.
Hetym publičnym zajavam papiaredničaŭ vizit amierykanskaj delehacyi va Uschodniuju Jeŭropu. Za tydzień da vystupu Trampa jaho śpiecyjalnyja pasłańniki Styŭ Uitkaf i Džared Kušnier naviedali Maskvu, paśla čaho nakiravalisia ŭ Kijeŭ. Heta byŭ ich pieršy vizit va ŭkrainskuju stalicu z pačatku poŭnamaštabnaha ŭvarvańnia ŭ 2022 hodzie. Paźniej Donald Tramp pravioŭ telefonnuju razmovu z Uładzimiram Pucinym. Pavodle słoŭ samoha prezidenta ZŠA, pytańnie spynieńnia ŭdaraŭ pa NPZ užo abmiarkoŭvałasia z kiraŭnictvam Ukrainy naŭprost.
Niahledziačy na cisk z boku Vašynhtona, ukrainskija vajskoŭcy praciahvajuć sistematyčna źniščać paliŭnuju i łahistyčnuju infrastrukturu ŭ hłybini rasijskaj terytoryi. U noč na 13 vieraśnia drony atakavali adrazu dva bujnyja pradpryjemstvy: «Słavianski» NPZ u Krasnadarskim krai i zavod «Tanieka» ŭ Nižniakamsku ŭ Tatarstanie, dzie byli zafiksavanyja pažary. Da hetaha, 10 vieraśnia, sieryja ŭdaraŭ pryjšłasia pa abjektach u Jamała-Nienieckaj aŭtanomnaj akruzie i Dahiestanie. U pryvatnaści, byŭ paškodžany marski handlovy port, jaki vykarystoŭvajecca dla vajennych pastavak pamiž Rasijaj i Iranam, a taksama raźmieščanyja pobač naftabaza i infrastruktura Kaśpijskaj fłatylii.
Ukrainski bok razhladaje hetyja apieracyi jak zakonny sposab pasłableńnia ekanomiki i vajenna-pramysłovaha kompleksu krainy-ahresara. Uładzimir Zialenski raniej aficyjna papiaredziŭ Maskvu ab simietryčnych žorstkich adkazach u vypadku, kali rasijskaja armija adnović zimovyja rakietnyja ŭdary pa ŭkrainskaj enierhietyčnaj sistemie.