Vyjšła Jana Pinčuk — administratarka telehram-kanałaŭ, jakuju ekstradavali z Rasii i jakoj prysudzili 12 hadoŭ

Dziaŭčyna žyła ŭ Maskvie i adtul dapamahała zatrymanym demanstrantam u Biełarusi.

Jana Pinčuk trapiła ŭ hrupu palitviaźniaŭ, vyzvalenych 16 vieraśnia 2026 hoda.

Jania Pinčuk naradziłasia ŭ 1997 hodzie ŭ Viciebsku. U 2018 hodzie pierajechała ŭ Maskvu, dzie zajmałasia prajektavańniem mietałakanstrukcyj dla naciažnych stolaŭ. Paźniej pierajšła pracavać aficyjantkaj, bo tam zarablała bolš. Kali padčas pandemii restarany zakrylisia, viarnułasia da prajektavańnia.

Paśla pačatku pratestaŭ u Biełarusi Pinčuk dapamahała zatrymanym i ich blizkim. Taksama była ŭdzielnicaj čata «Viciebsk 97%». Pry hetym u Biełaruś padčas pratestaŭ jana pryjazdžała tolki na niekalki dzion, kab naviedać maci.

Jania Pinčuk na sudzie. Fota Kanstancina Lankova, ZAKS.ru

Rasijskija siłaviki pryjšli ź pieratrusam u kvateru ŭ Sankt-Pieciarburhu, dzie Jana žyła sa svaim chłopcam Mikitam Safronavym, 1 listapada 2021 hoda. Siłavikoŭ najpierš cikaviŭ jaje telefon. Paśla pieratrusu Pinčuk aryštavali pa zapycie biełaruskich uładaŭ ab ekstradycyi.

Dziaŭčyna padała zajavu na atrymańnie statusu biežanca ŭ Rasii, adnak joj admovili.

Znachodziačysia pad vartaj, Jana vyjšła zamuž za Mikitu.

Advakaty Pinčuk tym časam sprabavali praz sud nie dapuścić jaje vydačy ŭ Biełaruś. Jašče da razhladu pytańnia ab ekstradycyi Jeŭrapiejski sud pa pravach čałavieka zapatrabavaŭ prypynić vydaču. Adnak u pačatku červienia 2022 hoda pieciarburhski sud dazvoliŭ vydać Pinčuk u Biełaruś, spasłaŭšysia na toje, što pradpisańnie JESPČ było vyniesiena ŭžo paśla vychadu Rasii z Rady Jeŭropy.

Kamitet pa pravach čałavieka AAN taksama zaklikaŭ Rasiju prypynić ekstradycyju Pinčuk da razhladu jaje skarhi.

Adnak 9 žniŭnia 2022 hoda Janu Pinčuk urešcie ekstradavali ŭ Biełaruś.

Sud nad palitźniavolenaj pačaŭsia 10 krasavika 2023 hoda ŭ Minskim haradskim sudzie i prachodziŭ u zakrytym režymie. Janie vystavili abvinavačańni pavodle piaci kryminalnych artykułaŭ: č. 3 art. 130 (raspalvańnie inšaj sacyjalnaj varožaści ci varažniečy); č. 3 art. 361 (publičnyja zakliki da zachopu dziaržaŭnaj ułady, hvałtoŭnaj źmieny kanstytucyjnaha ładu, ažyćciaŭleńnia dziejańniaŭ, nakiravanych na pryčynieńnie škody nacyjanalnaj biaśpiecy Biełarusi); č. 1 art. 361‑1 (stvareńnie ekstremisckaha farmavańnia); č. 3 art. 293 (navučańnie ci inšaja padrychtoŭka asob dla ŭdziełu ŭ masavych biesparadkach albo finansavańnie hetaj dziejnaści); č. 1 art. 290‑4 (stvareńnie arhanizacyi dla ažyćciaŭleńnia terarystyčnaj dziejnaści albo ŭdzieł u joj).

Pavodle viersii abvinavačańnia, Pinčuk bolš za hod zajmałasia «dyskredytacyjaj aficyjnaj ułady» ŭ internecie i zaklikała da ŭdziełu ŭ pratestach. Joj taksama stavili ŭ vinu administravańnie telehram-kanałaŭ «Viciebsk 97%», «Orša 97%» i «Navapołack i Połack 97%».

6 červienia 2023 hoda Pinčuk prysudzili 12 hadoŭ kałonii.

U Pinčuk astma. Paviedamlałasia, što peŭny čas jaje nie było ŭ kałonii — mierkavałasia, što palitźniavolenaja mahła znachodzicca ŭ balnicy.

Na voli Janu čakaje muž.

Kamientary da artykuła