ZŠA raskryli rasijskuju sietku padrychtoŭki teraktaŭ i zakaznych zabojstvaŭ
Miniust ZŠA zajaviŭ ab raskryćci sietki, jakaja rychtavała dyviersii ŭ Jeŭropie i zabojstvy apazicyjanieraŭ pa zadańni rasijskich śpiecsłužbaŭ.
Hienprakuror ZŠA Tod Błanš. AP Photo / Jacquelyn Martin
Udzielniki hetaj sietki šukali vykanaŭcaŭ dla fizičnaj likvidacyi jak minimum dvuch rasijskich apazicyjanieraŭ, a taksama dla ździajśnieńnia dyviersij suprać vajskovych i hramadzianskich abjektaŭ, piša Bi-bi-si.
Ministerstva justycyi ZŠA abviaściła pra rassakrečvańnie abvinavačańniaŭ suprać piaci čałaviek, jakija, pavodle źviestak viedamstva, pracavali na rasijskija raźviedvalnyja słužby.
U zajavie viedamstva havorycca, što hetaja sietka «płaciła i sprabavała płacić asobam u ZŠA i inšych krainach za praviadzieńnie papiaredniaha nazirańnia i ździajśnieńnie metanakiravanych zabojstvaŭ, a taksama daručała svaim saŭdzielnikam ździajśniać i sprabavać ździajśniać akty teraryzmu suprać hramadzianskaj i vajennaj infrastruktury ŭ jeŭrapiejskich krainach, jakija źviazanyja abo ličacca źviazanymi z Ukrainaj».
Apieratyŭnuju pracu pa raskryćci sietki viało FBR.
«Abvinavačańni, abvieščanyja siońnia, źjaŭlajucca kulminacyjaj vydatnaj pracy šmatlikich palavych adździaleńniaŭ FBR, padraździaleńniaŭ i partniorskich ahienctvaŭ, jakija razam sarvali sproby Rasii ździejśnić hvałtoŭnyja dziejańni ŭ stalicy našaj krainy i pa ŭsioj terytoryi Złučanych Štataŭ», — zajaviŭ pamočnik dyrektara słužby Daren Koks.
Kamu vystaŭlenyja abvinavačańni
U zajavie Miniusta nazvanyja piać čałaviek. Heta:
— 63‑hadovy Juryj Chramiejeŭ (u spravie taksama paznačany jak «pałkoŭnik Juryj»), były pałkoŭnik rasijskich śpiecsłužbaŭ, jaki ŭdzielničaŭ u viarboŭcy asob dla ździajśnieńnia zabojstvaŭ rasijskich apazicyjanieraŭ;
— jaho 27‑hadovy syn Kirył Chramiejeŭ, supracoŭnik FSB;
— hramadzianin Kuby Oemis Ramahosa Duruci, 35 hadoŭ;
Jaidel Delhada Suares, taksama viadomy jak «Vikinh», 35 hadoŭ, hramadzianin Kuby;
— Anchiel Eduarda Kastra, 22 hady, hramadzianin Vieniesueły.
Pra kubinca Oemisa Ramahosu Duruci raniej pisali ŚMI ŭ suviazi z dyviersijami ŭ Litvie.
Deutsche Welle, aznajomiŭšysia z dakumientami, vyśvietliła, što ŭ 2024 hodzie niechta pad psieŭdanimam «Dyjas» daručaŭ zavierbavanym im vykanaŭcam padpalvać składy budaŭničych materyjałaŭ u Polščy, aŭtobusny park u Čechii, pradpryjemstva pa pierapracoŭcy adchodaŭ u Rumynii, a taksama abstalavańnie litoŭskaj vytvorčaści, pryznačanaje dla Ukrainy.
Pavodle źviestak vydańnia, pad hetym psieŭdanimam chavaŭsia Oemis Ramahosa Duruci, hramadzianin Kuby, jaki pražyvaje ŭ Rasii i abjaŭleny ŭ vyšuk pravaachoŭnymi orhanami Litvy.
U čym ich abvinavačvajuć
Pavodle źviestak Miniusta ZŠA, udzielniki sietki dziejničali pa zadańni rasijskich śpiecsłužbaŭ. Uletku 2026 hoda sietka zavierbavała žychara ZŠA dla sačeńnia za viadomym rasijskim apazicyjanieram, jaki žyvie ŭ ZŠA. Imia apazicyjaniera nie nazyvajecca, u zajavie Miniusta jaho nazyvajuć «Achviara-1».
Suares pieradaŭ zavierbavanamu dadzienyja dla sačeńnia. Toj pieradaŭ zakazčyku fatahrafii i videazapisy miescaŭ, źviazanych z patencyjnaj achviaraj, paśla čaho Suares i Kastra prapanavali jamu ździejśnić zabojstva za ŭznaharodžańnie 40 tysiač dalaraŭ.
Akramia taho, toj ža Suares, pavodle źviestak Miniusta i FBR, sprabavaŭ zavierbavać niekalkich inšych asob u ZŠA dla sačeńnia i zabojstva nie tolki «Achviary-1», ale i inšych metaŭ.
U 2025 hodzie, pavodle źviestak FBR, taja ž sietka zavierbavała nienazvanaha hramadzianina ZŠA dla sačeńnia za inšym rasijskim apazicyjanieram, jaki znachodzicca ŭ Litvie (jon paznačany jak «Achviara-2»). U apieracyi ŭdzielničali Kirył Chramiejeŭ i jaho baćka Juryj Chramiejeŭ.
Pieramovy z zavierbavanym vykanaŭcam adbyvalisia pa toj ža schiemie. Spačatku Kirył Chramiejeŭ paprasiŭ zrabić zdymki pa ŭkazanym adrasie pražyvańnia patencyjnaj achviary, a zatym Chramiejeŭ-starejšy prapanavaŭ vykanaŭcu 25 tysiač dalaraŭ za zabojstva.
Jak adznačajecca ŭ zajavie Miniusta ZŠA, Juryj Chramiejeŭ rastłumačyŭ vykanaŭcu, što žadaje śmierci «Achviary-2», tamu što toj «lje brud na krainu» i «skažaje historyju». Zatym Chramiejeŭ-starejšy prapanavaŭ mahčymyja sposaby zabojstva.
Kali zavierbavany amierykaniec admoviŭsia, jamu prapanavali «bolš prostuju pracu» — «padpał składa z majomaściu abo praduktami» albo «kidańnie butelki ź bienzinam u elektrapadstancyju», havorycca ŭ zajavie amierykanskich uładaŭ.
Sietka taksama, jak miarkujecca, vierbavała inšych asob dla ździajśnieńnia dyviersij u Jeŭropie. Pavodle źviestak Miniusta, Oemis Ramahosa Duruci ŭ červieni 2024 hoda kaardynavaŭ dyviersiju ŭ Čechii, a ŭ vieraśni 2024 hoda — u Litvie.
Juryj Chramiejeŭ, Kirył Chramiejeŭ, Oemis Ramahosa Duruci, Jaidel Delhada Suares i Anchiel Eduarda Kastra abvinavačvajucca va ŭdziele ŭ zmovie z metaj finansavańnia teraryzmu. Juryj Chramiejeŭ, Suares i Kastra taksama abvinavačvajucca va ŭdziele ŭ zmovie z metaj ździajśnieńnia zakaznoha zabojstva.
Za pieršaje abvinavačańnie praduhledžvajecca maksimalnaje pakarańnie ŭ vyhladzie 20 hadoŭ pazbaŭleńnia voli, za druhoje — da 10 hadoŭ.
Usie fihuranty zaraz znachodziacca na voli, havorycca ŭ zajavie Miniusta ZŠA.