Vajna ź Iranam pryviała da deficytu bojeprypasaŭ u ZŠA
Straty vajennaj techniki skłali $3,7 młrd, jašče $7,4 młrd prypali na inšyja vydatki.
AP Photo / Sean Murphy, File
Hienieralny inśpiektar Ministerstva abarony ZŠA zajaviŭ, što vajna ź Iranam pryviała da deficytu šerahu bojeprypasaŭ i prablem z papaŭnieńniem ich zapasaŭ. Hetyja vysnovy razychodziacca z zajavami prezidenta Donalda Trampa, jaki nieadnarazova admaŭlaŭ, što ZŠA sutykajucca ź niedachopam uzbrajeńniaŭ, piša Bi-bi-si.
Tramp śćviardžaŭ, što amierykanskija zapasy bojeprypasaŭ «praktyčna nieabmiežavanyja», a paviedamleńni ab ich vyčarpańni nazyvaŭ «fejkavymi navinami».
Adnak niezaležny nahladny orhan Pientahona paviedamiŭ, što ź lutaha pa červień ZŠA vydatkavali na bojeprypasy bolš za $22 młrd, što pryviało da «deficytu stratehičnych zapasaŭ».
Na pytańni presy ab vysnovach hienieralnaha inśpiektara ŭ Biełym domie zajavili, što Złučanyja Štaty majuć «bolš čym dastatkovuju» kolkaść bojeprypasaŭ. Hety dakład upieršyniu daje niezaležnaje ŭjaŭleńnie pra stan amierykanskich zapasaŭ uzbrajeńniaŭ — infarmacyja ab ich realnych abjomach zvyčajna zasakrečanaja.
Papiarednija acenki ŭžo pakazvali na surjozny deficyt niekatorych vidaŭ bojeprypasaŭ.
Za čas vajny amierykanskija siły vydatkavali vielizarnuju kolkaść jak dalnabojnych udarnych srodkaŭ, tak i rakiet sistem supraćpavietranaj i supraćrakietnaj abarony, jakija vykarystoŭvalisia dla pierachopu iranskich atak.
Pavodle acenki Centra stratehičnych i mižnarodnych daśledavańniaŭ (CSIS), apublikavanaj u kancy lipienia, zapasy niekatorych rakiet-pierachopnikaŭ, u tym liku dla kompleksaŭ Patriot i THAAD (Terminal High Altitude Area Defense), značna skaracilisia — u asobnych vypadkach bolš čym napałovu. U dakładzie hienieralnaha inśpiektara nie raskryvajecca, kolki mienavita takich uzbrajeńniaŭ zastałosia ŭ rasparadžeńni ZŠA. Adnak u im paćviardžajecca najaŭnaść deficytu zapasaŭ i havorycca pra «słabyja miescy ŭ abaronna-pramysłovaj bazie», jakija pieraškadžajuć ich chutkamu papaŭnieńniu.
U dakumiencie adznačajecca, što Ministerstva abarony ciapier sprabuje paskoryć pracedury zakupak i skaracić terminy vytvorčaści, kab likvidavać deficyt i atrymać mahčymaść «apieratyŭna reahavać na nadzvyčajnyja situacyi».
Bieły dom adchiliŭ vysnovy nahladnaha orhana.
«Uzbrojenyja siły Złučanych Štataŭ majuć bolš čym dastatkovyja zapasy bojeprypasaŭ i ŭzbrajeńniaŭ dla vykanańnia ŭsich stratehičnych zadač, pastaŭlenych hałoŭnakamandujučym, i navat bolš», — zajaviła ŭ aŭtorak pradstaŭnica Biełaha doma Hanna Keli.
Tramp i inšyja pradstaŭniki jaho administracyi taksama nieadnarazova nazyvali paviedamleńni pra niedachop bojeprypasaŭ iłžyvymi, a niekatoryja z takich publikacyj — navat «zdradnickimi».
4 žniŭnia ministr abarony Pit Chiehsiet napisaŭ u X, što paviedamleńni ŚMI pra deficyt uzbrajeńniaŭ «nie adpaviadajuć rečaisnaści».
A 3 vieraśnia Tramp u razhornutaj publikacyi ŭ Truth Social zajaviŭ, što ZŠA majuć «praktyčna nieabmiežavanyja» zapasy bojeprypasaŭ i praciahvajuć ich nazapašvać, «rychtujučysia da luboha mahčymaha raźvićcia padziej».
Dakład hienieralnaha inśpiektara taksama dazvalaje acanić košt vajny. Straty vajennaj techniki skłali $3,7 młrd, jašče $7,4 młrd prypali na inšyja vydatki. Usiaho z 28 lutaha pa 30 červienia ZŠA vydatkavali na vajnu $33,4 młrd.
Pry hetym asobnaja acenka Biudžetnaha ŭpraŭleńnia Kanhresa (CBO), apublikavanaja ŭ aŭtorak, akazałasia jašče vyšejšaj — $38 młrd. U hetuju sumu ŭklučany košt papaŭnieńnia vydatkavanych bojeprypasaŭ i stračanaj u bajach techniki, dadatkovyja hadziny bajavych vyletaŭ i pavieličeńnie vydatkaŭ na paliva.
Siarod stračanaj techniki — čatyry źniščalniki F-15E, najnoŭšy małazaŭvažny źniščalnik F-35 Joint Strike Fighter i 30 bieśpiłotnikaŭ MQ-9, źniščanych, jak havorycca ŭ dakładzie, «pry roznych abstavinach».
Kali ZŠA i Izrail pačali nanosić udary, Donald Tramp nieadnarazova zajaŭlaŭ, što kanflikt skončycca na praciahu niekalkich tydniaŭ.
Adnak paźniej prezident źmianiŭ svaje prahnozy i zajaviŭ, što vajna moža praciahvacca da pramiežkavych vybaraŭ u ZŠA ŭ listapadzie i skončycca tolki «adrazu paśla» ich.
Apytańni pakazvajuć, što vajna nie karystajecca padtrymkaj bolšaści amierykancaŭ.
Zhodna z apytańniem Reuters/Ipsos, apublikavanym u pačatku vieraśnia, tolki 23% amierykancaŭ ličać, što ŭ vyniku vajny pazicyi ZŠA ŭ supraćstajańni ź Iranam stali macniejšymi, čym da pačatku bajavych dziejańniaŭ. Navat siarod prychilnikaŭ Respublikanskaj partyi takoha mierkavańnia prytrymlivajecca tolki kala pałovy apytanych.