U 18‑hadovaha syna kiraŭnika Čačni źjaviłasia ŭłasnaje vojska
U Čačni ŭ 18‑hadovaha syna kiraŭnika respubliki Adama Kadyrava źjaviłasia ŭłasnaje siłavoje padraździaleńnie, jakoje atrymała nazvu «Dustum K-13», piša «Viorstka».
Pavodle źviestak vydańnia, bajcy hetaha padraździaleńnia bazujucca na abjekcie śpiecyjalnaha atrada chutkaha reahavańnia «Achmat» u rodnym siale starejšaha Kadyrava — Achmat-Jurcie. U kancy 2025 — pačatku 2026 hoda ŭ čačenskich miedyja stali źjaŭlacca paviedamleńni pra toje, što supracoŭniki «haradskoj hrupy Centralnaj bazy Dustum K-13» pravodziać rejdy na darohach — spyniajuć kiroŭcaŭ i praviarajuć ich aŭtamabili.
Pry hetym u «Dustum K-13» jość kanał u Instagram, dzie publikujucca videa dziejnaści «supracoŭnikaŭ centra». Tak, na adnym z rolikaŭ mužčyny ŭ kiepkach z nadpisam «Dustum» vučacca źbivać drony i kiravać bieśpiłotnikami. Taksama jość videa strajavoj padrychtoŭki, trenirovak pa stralbie i evakuacyi paranienych.
Adam Kadyraŭ atrymaŭ šyrokuju viadomaść u vieraśni 2023 hoda, kali źbiŭ aryštavanaha za spaleńnie Karana Mikitu Žuraviela ŭ SIZA Hroznaha, piša Moscow Times.
Paśla hetaha jon dvojčy staŭ Hierojem Čačni i atrymaŭ niekalki vysokich pasad u respublicy, u tym liku pasady sakratara Savieta biaśpieki i kuratara MUS. Akramia taho, Kadyraŭ-małodšy byŭ pryznačany načalnikam słužby biaśpieki baćki. U kastryčniku 2024 hoda jaho imia ŭnieśli ŭ Knihu rekordaŭ Rasii jak imia samaha maładoha načalnika słužby biaśpieki kiraŭnika subjekta — tady jamu było 16 hadoŭ.
Za hety čas Kadyraŭ-małodšy atrymaŭ bolš za 20 uznaharod.