Jaŭhien Karavułaŭ z KR: «Mnie prapanavali supracoŭničać z KDB. I ja skazaŭ «tak»
Jaŭhien Karavułaŭ, jaki niadaŭna pretendavaŭ na pasadu sakratara Kaardynacyjnaj rady, napisaŭ pra toje, što ŭžo try miesiacy KDB teraryzuje jaho siamju ŭ Biełarusi, i padrabiazna raśpisaŭ, jak hebisty sprabavali ŭciahnuć u svaju arbitu i jaho samoha.
Jaŭhien Karavułaŭ. Fota: facebook.com/JauhienKaraulau
25 červienia Karavułavu patelefanavali z babulinaha telefona, ale zamiest jaje na suviazi byŭ mužčyna, jaki pradstaviŭsia Ženiem i skazaŭ: «Ty ž viedaješ, chto my».
Pierad hetym u svajakoŭ Karavułava ŭžo nieadnarazova pravodzili vobšuki, a adnojčy navat dasłali ź nieviadomaha numaru zdymak ź minskaj kvatery. Ale takaja forma kamunikacyi sa śpiecsłužbami Łukašenki była dla jaho novaja.
Pa słovach mužčyny, jon adrazu napisaŭ u svaju frakcyju KR «Nastup» i pravaabaroncam, jamu paraili pacichu zakančvać razmovu, ale hebist pahrozami na adras rodnych prymusiŭ jaje praciahvać. Razmova doŭžyłasia kala 45 chvilin, «najbolš ich cikaviła Kaardynacyjnaja Rada: jak jana pracuje i čym zajmajecca». Ale Karavułaŭ, pa jahonych słovach, nie skazaŭ ničoha bolš, čym možna znajści ŭ internecie.
«U niejki momant mnie prapanavali supracoŭničać z KDB. Spačatku ja adkazaŭ «uhu», ale ad mianie patrabavali adnaznačnaha adkazu, i pad ciskam, bajučysia za siamju, ja skazaŭ «tak». Jašče mnie zahadali anikomu pra hetuju razmovu nie raskazvać, ale ŭžo było pozna».
I tolki paśla taho, jak hebisty ŭziali ŭ Karavułava numar dla suviazi i zapatrabavali kod z SMS dla ŭvachodu ŭ telehram-akaŭnt:
«Heta mianie praćvieraziła. Kodu ja nie atrymaŭ, tak i skazaŭ, dadaŭ, što aničoha pieradavać nie źbirajusia, i pakłaŭ słuchaŭku».
Paśla taho Jaŭhienu jašče pisali z telefonu maci i patrabavali nieadkładna vyjści na suviaź, ale «ja zabłakavaŭ ich akaŭnty, i bolš sa mnoj anichto nie kantaktavaŭ».
Paźniej jahonym svajakam nie davali spakoju: prychodzili na pracu i dachaty, zabirali techniku, maci dva razy ciahali na dopyty i «prasili pieradać mnie, što chočuć «prosta parazmaŭlać».
«A siońnia ranicaj patelefanavali z babulinaha telefonu. Ja znoŭ adrazu zabłakavaŭ. Skazali, što zaŭtra ŭviečary znoŭ pryjduć i zabiaruć telefon, kab «prosta parazmaŭlać», — dzielicca Karavułaŭ.
A naprykancy daje ŭsim paradu:
«Kali vam telefanujuć z KDB, u tym liku z numaroŭ vašych rodnych, nie ŭstupajcie ŭ razmovu. Adrazu błakujcie, bo, kali pačniacie havaryć, jany ŭžo nie adčepiacca. I adrazu pišycie pravaabaroncam, jany dapamohuć».
Čytajcie taksama:
Ofis Cichanoŭskaj: Pavodziny Charysavaj nielha apraŭdać ciskam