Zasnavalnik TikTok staŭ samym bahatym čałaviekam Azii

Zasnavalnik kampanii ByteDance Čžan Imin, jakoj naležyć TikTok, upieršyniu staŭ samym bahatym čałaviekam u Azii. Pavodle acenki Bloomberg Billionaires Index, jaho bahaćcie pieravysiła 105 miljardaŭ dalaraŭ. Jon abyšoŭ indyjskaha biznesmiena Haŭtama Adani. Značny rost bahaćcia Čžana źviazvajuć z raźvićciom štučnaha intelektu ŭ ByteDance.

Čžan Imin. Fota: AP

43‑hadovy Čžan Imin tolki za vierasień pavialičyŭ svajo bahaćcie bolš čym na 12 miljardaŭ dalaraŭ. Heta adbyłosia paśla taho, jak byli praanalizavanyja apošnija acenki koštu ByteDance, apublikavanyja inviestycyjnymi kampanijami BlackRock, Fidelity Investments i T. Rowe Price.

Z sakavika 2019 hoda, kali Bloomberg pačaŭ adsočvać bahaćcie Čžana, jano vyrasła prykładna ŭ vosiem razoŭ — z 13 miljardaŭ da bolš čym 105 miljardaŭ dalaraŭ.

Hałoŭnym faktaram rostu ByteDance staŭ užo nie tolki TikTok, ale i raźvićcio praduktaŭ na asnovie štučnaha intelektu. Siarod ich — čat-bot Doubao i hienieratar videa Seedance.

Hałoŭny analityk daśledčaj kampanii Omdia Lian Džej Su adznačyŭ, što Čžan Imin paśladoŭna prytrymlivaŭsia abranaha kursu i praciahvaŭ pavialičvać inviestycyi ŭ štučny intelekt. Pavodle jaho słoŭ, ByteDance moža vykarystoŭvać vialiki abjom danych sa svaich sacyjalnych płatformaŭ dla navučańnia madelaŭ štučnaha intelektu. Pry hetym adnoj z hałoŭnych ryzyk dla kampanii zastajecca vysokaja kankurencyja na kitajskim rynku.

Papiaredni rekardsmien Haŭtam Adani vyjšaŭ na pieršaje miesca ŭ śpisie samych bahatych ludziej Azii ŭ červieni, kali jaho bahaćcie dasiahała 120 miljardaŭ dalaraŭ. Adnak u apošnija miesiacy jaho bahaćcie skaraciłasia paśla padzieńnia akcyj kampanij jaho kanhłamieratu. Na ich kaciroŭki paŭpłyvali pierabałansavańnie indeksa MSCI i bolš šyroki rasprodaž na rynkach na fonie rostu cen nnaftu i dachodnaści ablihacyj.

Pry acency stanu Čžana Bloomberg prymianiaje 10‑pracentnuju źnižku da koštu niepubličnaj ByteDance. Heta źviazana z ryzykami, jakija stvaraje zakrytaja struktura ŭłasnaści kampanii.

Rost bahaćcia Čžana adbyvajecca na fonie značnaha pieraraźmierkavańnia kapitału ŭ technałahičnym siektary Kitaja. Bum štučnaha intelektu spryjaje źjaŭleńniu novych miljarderaŭ, u tym liku siarod uładalnikaŭ kampanij, jakija pakul nie vyjšli na prybytkovaść.

Za apošnija hady ByteDance pieratvaryłasia z kampanii, hałoŭnym hłabalnym praduktam jakoj byŭ TikTok, u adnaho z najbujniejšych hulcoŭ kitajskaha rynku štučnaha intelektu. Adnačasova kampanija praciahły čas sutykałasia z prablemami vakoł pracy TikTok u ZŠA. U pačatku 2026 hoda supraćstajańnie zaviaršyłasia pieradačaj častki amierykanskich apieracyj inviestaram z ZŠA.

Kitajskija ŭłady aktyŭna padtrymlivajuć raźvićcio štučnaha intelektu ŭ ramkach technałahičnaj kankurencyi sa Złučanymi Štatami. Piekin adchiliŭ zakliki amierykanskich kiraŭnikoŭ technałahičnych kampanij zapavolić raźvićcio ŠI i ŭzmacnić abmiežavańni dla kitajskich raspracoŭščykaŭ adpaviednych madelaŭ.

Kamientary da artykuła