U ZŠA ź mihracyjnaj turmy vyzvalili biełarusku, u jakoj byŭ rak ščytapadobnaj załozy
Mihracyjnaja i mytnaja słužba ZŠA vyzvaliła hramadzianku Biełarusi Kaciarynu Bartko, jakaja paprasiła prytułak.
Jana ŭtrymlivałasia ŭ centry ŭ Livienvorcie, štat Kanzas. Pra heta paviedamlaje Reform.news sa spasyłkaj na telekanał FOX4.
Kaciaryna Bartko vyzvalenaja ŭ suviazi z paharšeńniem stanu zdaroŭja. Raniej telekanał raspaviadaŭ pra jaje spravu.
Pavodle jaho infarmacyi, Bartko pieraniesła rak. Joj zrabili apieracyju pa vydaleńni ščytapadobnaj załozy, i ciapier jana štodnia prymaje leki. Jana pryjechała ŭ ZŠA ŭ 2022 hodzie pa studenckaj vizie i padała zajavu na atrymańnie prytułku, spasyłajučysia na pieraśled z boku biełaruskich uładaŭ.
Jana ŭtrymlivałasia ŭ centry ICE CoreCivic. Na vychodnych jaje stan zdaroŭja nastolki pahoršyŭsia, što žančynu daviałosia špitalizavać. Ciapier jana prachodzić lačeńnie ŭ balnicy Univiersiteta Kanzasa.
Paśla zaviaršeńnia lačeńnia jana zmoža viarnucca ŭ Majami pry ŭmovie vykarystańnia GPS-manitorynhu. Sudovaje raźbiralnictva pa imihracyjnaj spravie pavinna adbycca ŭ kancy miesiaca.
Historyja zatrymańnia Kaciaryny nahadvała absurdny film. Usio pačałosia 6 maja 2026 hoda sa svarki na viečarynie. Para hučna pasvaryłasia ŭnačy ź inšymi haściami i syšła, ale niechta vyklikaŭ palicyju.
«U Fłarydzie pa takich vyklikach zatrymańnie aŭtamatyčnaje, da vyśviatleńnia abstavinaŭ — taki paradak. Detektyŭ mnie skazaŭ, što nie bačyć składu złačynstva i zakryje spravu. Ale ŭ štacie Fłaryda — heta ledź nie adziny taki štat u ZŠA — štat usio adno moža dać spravie chod, kali paličyć patrebnym. Što jon i zrabiŭ», — raskazvaŭ jaje chłopiec Dźmitryj Šyšoŭ.
Kaciarynu ŭziali pad vartu, praź niejki čas sud spravu zakryŭ, ale Kaciarynu nie adpuścili, a pieraviali ŭ imihracyjnuju turmu tolki na padstavie novaha žorstkaha cyrkulara suprać ludziej z praterminavanymi vizami.