Vajskovy daradca Trampa paraiŭ rychtavacca da bajavych dziejańniaŭ na arbicie Miesiaca
Pa jaho słovach, ZŠA rychtujucca da novaha rubiaža ŭ vajennych dziejańniach paśla taho, jak amierykanskija ŭłady ŭpieršyniu zajavili ab raźmiaščeńni zbroi ŭ kosmasie.
Den Kiejn. AP Photo / Jacquelyn Martin, file
Amierykanskija vajskoŭcy pavinny rychtavacca da bajavych dziejańniaŭ nie tolki na arbicie Ziamli, ale i ŭ rajonie Miesiaca, zajaviŭ u sieradu hałoŭny vajskovy daradca prezidenta Donalda Trampa. Jon adznačyŭ, što ZŠA rychtujucca da novaha rubiaža ŭ vajennych dziejańniach paśla taho, jak amierykanskija ŭłady ŭpieršyniu zajavili ab raźmiaščeńni zbroi ŭ kosmasie, piša AP.
Hienierał Den Kiejn, staršynia Abjadnanaha kamiteta načalnikaŭ štaboŭ, vystupajučy pierad vajskoŭcami i pradstaŭnikami abaronnaj pramysłovaści na kanfierencyi Air, Space and Cyber Conference pad Vašynhtonam, zajaviŭ, što amierykanskija ŭzbrojenyja siły pavinny ŭžo ciapier adaptavacca, kab być «hatovymi zmahacca, vytrymlivać nahruzki i pieramahać … ad marskoha dna da kosmasu.
Kaśmičnyja siły ZŠA (Space Force), najmaładziejšy vid amierykanskich uzbrojenych sił, stvorany Trampam u 2019 hodzie, rychtujucca da viadzieńnia bajavych dziejańniaŭ u kosmasie i ŭ rajonie Miesiaca.
Jak asobna zajaviŭ žurnalistam hienierał-lejtenant Hrehary Hańjon, kiraŭnik Kamandavańnia bajavych sił Space Force, heta nieabchodna tamu, što «čałaviectva prasoŭvajecca ŭsio hłybiej u kosmas — zadača Space Force zaklučajecca ŭ tym, kab dapamahać rychtavacca da abarony intaresaŭ ZŠA».
Zajava pra hatoŭnaść amierykanskich vajskoŭcaŭ vieści bajavyja dziejańni ŭ prastory pamiž vysokaj kalaziamnoj arbitaj i samim Miesiacam prahučała praź niekalki dzion paśla taho, jak ministr VPS ZŠA Troj Majnk na toj ža kanfierencyi paviedamiŭ, što ZŠA raźmiaścili «kaśmičnuju zbroju dla kantrolu na arbicie».
Sieryja zajavaŭ amierykanskich vajennych čynoŭnikaŭ pra kaśmičnuju zbroju ŭ apošnija dni supiarečyć daŭnim normam i mižnarodnym damoŭlenaściam, pavodle jakich adkryty kosmas pavinien vykarystoŭvacca vyklučna ŭ mirnych metach i zastavacca niemilitaryzavanym.