U vyšuk abviaścili mahiloŭskaha deputata i pradziusara. Ź im za miažu źjechała viadučaja dziaržaŭnaha telekanała
Niadaŭna MUS abviaściła ŭ vyšuk Alaksandra Łaŭrynoviča — u minułym pradziusara prapahandysckich mierapryjemstvaŭ i deputata haradskoha savieta Mahilova. Ciapier stała viadoma, što pajechaŭ jon nie adzin: vyhladaje na toje, što razam ź im za miažu nakiravałasia televiadučaja dziaržkanała «Biełaruś 2» Natalla Paŭšok, raskazvaje «Lusterka».
Natalla Paŭšok. Fota: news.by
Što za Łaŭrynovič i čamu jon u vyšuku
Alaksandr Łaŭrynovič — dyrektar i zasnavalnik kampanii «Fiestyvali Baj», jakaja zajmałasia arhanizacyjaj kancertaŭ, fiestyvalaŭ i konkursaŭ talentaŭ. U ŚMI jon źjaŭlaŭsia taksama jak pradziusar «nacyjanalnaha» realici-šou «Fabryka błohieraŭ» i interaktyŭnaha sieryjała «Zumiery», a taksama nastaŭnik u šou ANT «Zorny šlach».
Alaksandr Łaŭrynovič. Fota: ont.by
U pačatku 2026 hoda ŭ siłavych viedamstvaŭ uźnikli pytańni da dziejnaści Łaŭrynoviča, a sam jon pakinuŭ krainu. 17 sakavika Śledčy kamitet zabaraniŭ uładalniku «Fiestyvali Baj» pradavać svaje doli ŭ kampanii. 10 krasavika 2026 hoda pradziusara abviaścili ŭ vyšuk.
Pavodle infarmacyi «Lusterka», Łaŭrynovič fihuruje jak padazravany ŭ raźbiralnictvie pa karupcyjnych artykułach. U spravie fihuruje suma zvyš 200 tysiač rubloŭ. Padstavaj dla pretenzij stała arhanizacyja haradskich mierapryjemstvaŭ u Breście.
«Kinuła pracu», źnikła z sacsietak
Razam z Łaŭrynovičam Biełaruś pakinuła televiadučaja Natalla Paŭšok, paviedamili krynicy «Lusterka».
«Kinuła pracu na telebačańni i źbiehła ź im, navat zajavu [na zvalnieńnie] nie napisaŭšy, — śćviardžaje krynica. — <…> Jon navat nie raźvieŭsia z žonkaj. Prosta kinuŭ ich ź dziciem i pakaciŭ».
Surazmoŭca «Lusterka» śćviardžaje, što eks-deputat mieŭ raman z Paŭšok.
Natalli Paŭšok 29 hadoŭ, jana pracavała na dziaržaŭnym telekanale «Biełaruś 2». Była viadučaj i redaktaram moładzievaha interaktyŭnaha prajekta «Pin kod», vypuskajučym redaktaram, karespandentam ranišniaha šou «Dobraj ranicy, Biełaruś», redaktaram prahramy «Ničoha sabie ńjuz».
Natalla Paŭšok na ŭručeńni ŭznaharody «Televiaršynia». Minsk, červień 2024 hoda. Fota: natashapavshok / Instagram
U minułym Paŭšok udzielničała ŭ prajektach kamandy Łaŭrynoviča — viała «Fabryku błohieraŭ» i była kreatyŭnaj pradziusarkaj sieryjała «Zumiery».
Ciapier biełaruski numar telefona televizijščycy niedastupny. Ź lutaha 2026 hoda ŭ jaje Instagram pierastali źjaŭlacca novyja publikacyi.
U šou «Pin kod» Natalla bolš nie pracuje. Miarkujučy pa telehram-kanale prajekta, u lutym byŭ pieraboj z vypuskami, u sakaviku adna z padpisčyc cikaviłasia, čamu prahramu «bolš nie pakazvajuć». Da kanca miesiaca anonsy znoŭ stali rehularnymi, ale prahrama źmianiła hrafik vychadu — zamiest čatyroch vypuskaŭ na tydzień ciapier vypuskajuć tolki adzin. U krasaviku novaj viadučaj «Pin koda» stała 16‑hadovaja śpiavačka Nastaśsia Łupina, jakaja vystupaje pad psieŭdanimam Stasia Korsak.
«Mižnarodnaja kampanija, jakaja adkryła pradstaŭnictva ŭ AAE»
A čym dalej zanialisia Łaŭrynovič i Paŭšok? U tym ža miesiacy, kali abiedźvie asoby źnikli z sacsietak, ich imiony źjavilisia ŭ publikacyi novaha prajekta Creative global group, jaki zajmaŭsia arhanizacyjaj mierapryjemstvaŭ u Dubai. «My mižnarodnaja kampanija, jakaja adkryła pradstaŭnictva ŭ AAE», — śćviardžali jaje stvaralniki.
Partrety Alaksandra Łaŭrynoviča i Natalli Paŭšok u rekłamie novaha prajekta. Skrynšot: Creative global group / facebook.com
U sacsietkach prajekta Łaŭrynoviča pradstaŭlali dyrektaram, a Paŭšok — partniorkaj i kreatyŭnaj pradziusarkaj. Rekłamu novaj firmy aktyŭna rassyłali pa čatach ruskamoŭnych žycharoŭ Dubaja. Cikava, što pad adnym z takich pastoŭ Paŭšok z asabistaha akaŭnta pakinuła rekamiendacyju, byccam sama była klijentkaj firmy i joj usio spadabałasia.
Arhanizatary byli hatovyja pravieści viasielle ci dziciačy dzień naradžeńnia, a taksama «pryvieźci lubych artystaŭ, ad suśvietnych zorak da top-vykanaŭcaŭ». U sacsietkach jany pakazvali vyjavy, zhienieravanyja štučnym intelektam, a taksama raniejšyja prajekty kamandy Łaŭrynoviča — fiestyval Millennium u Breście i sieryjał «Zumiery».
Niezrazumieła, ci praviała hetaja «mižnarodnaja kampanija» chacia b adno mierapryjemstva. U krasaviku jaje akaŭnty stali prapanoŭvać užo inšuju pasłuhu — dyzajn rekłamy i publikacyj u sacyjalnych sietkach, a nieŭzabavie zharnuli aktyŭnaść.
«Pracujem u pary»
Z numaram telefona emirackaj firmy byŭ źviazany telehram-akaŭnt ź imiem A&N. Za hetymi litarami ŭ teoryi mohuć stajać imiony Alaksandr i Natalla. «Pracujem u pary: tarhietynh, AI-kreatyvy, scenaryi, pradziusavańnie, SMM», — havorycca ŭ jaho apisańni.
Skrynšot parnaha akaŭnta, jaki rassyłaŭ rekłamu emirackaj firmy Creative global group
Užo ŭ krasaviku 2026 hoda aŭtary akaŭnta zacikavilisia novym pierajezdam. «My para ź Biełarusi. Płanujem pierajezd u Ispaniju. Razhladajem horad Almieryja», — pisali jany za dzień da abviaščeńnia Łaŭrynoviča ŭ miždziaržaŭny vyšuk na radzimie.
Praź niekalki tydniaŭ jany ŭžo pradstaŭlalisia rasijanami i źbiralisia ŭ Čarnahoryju, paśla vyviedyvali nakont lehalizacyi ŭ Mieksicy. Miarkujučy pa aktyŭnaści ŭ čatach, u vyniku A&N usio ž taki apynulisia ŭ Čarnahoryi.
Niadaŭna parny akaŭnt pačaŭ prasoŭvać novy prajekt, tvaram jakoha vystupiła Natalla Paŭšok. Ciapier byłaja televiadučaja prapanuje anłajn-zaniatki pa mastackaj himnastycy. Jana pradstaŭlajecca jak «majstar sportu, člen nacyjanalnaj zbornaj, čempijonka respubliki i trenier pa mastackaj himnastycy».
Akaŭnt Natalli Paŭšok, pryśviečany anłajn-treniroŭkam pa mastackaj himnastycy. Skrynšot: natalya_rg_online / Instagram
Paŭšok sapraŭdy ŭ minułym zajmałasia mastackaj himnastykaj prafiesijna i treniravała dziaciej. Praŭda, u novym akaŭncie jana čamuści nie pakazvaje svajo proźvišča i nie piša, u nacyjanalnuju zbornuju jakoj krainy ŭvachodziła. Kansultavać jana hatovaja tolki anłajn na ruskaj abo anhlijskaj movach.