Piure, miasa pa-francuzsku i višnia ŭ dvary. Aryna Sabalenka pakazała siamiejnaje zastolle ŭ babuli ŭ Biełarusi

Padčas lipieńskaha vizitu tahačasnaj pieršaj rakietki śvietu Aryny Sabalenki ŭ rodny Minsk tenisistka paznajomiła svajho žanicha Hieorhiosa Franhulisa sa svaimi babulami, a tyja sa svajho boku zładzili dušeŭnaje zastolle. «Časam treba viarnucca dadomu i padychać rodnym pavietram», — skazała Aryna ŭ 10‑chvilinnym filmie pra vizit u Minsk, jaki vyjšaŭ na jaje youtube-kanale, piša «Komsomolskaja pravda».

Hieorhias upieršyniu pryjechaŭ u Minsk i paznajomiŭsia ź siamjoj Aryny. Fota: youtube-kanał Aryny Sabalenki

Jašče ŭ samalocie, pa darozie ŭ Minsk, Aryna pradčuvała:

«My pajedziem na viačeru da majoj babuli, i jana pryhatuje najlepšyja stravy. Sałaciki, miasa pa-francuzsku, kuračku… A samaje majo lubimaje: naciorty časnakom padsmažany chleb z syram i pamidoram. Jašče ŭsie saleńni pakaštujem».

Babuli pryhatavali chatniuju viačeru. Fota: youtube-kanał Aryny Sabalenki

Usio tak i było, tolki ŭsialakich prysmakaŭ było na stale bolš, čym mahła ŭjavić Aryna. Miasa pa-francuzsku taksama było. Kali Hieorhias pacikaŭsia hetaj stravaj, Aryna jamu padrabiazna patłumačyła, jak jaje hatujuć.

Siamja ciopła sustreła Hieorhiosa i Arynu. Fota: youtube-kanał Aryny Sabalenki

Ale heta budzie paźniej, a na padychodzie da doma babuli ŭnučka z žanichom zatrymalisia kala višni. Aryna pakazała Hieorhiasu, što jahadu možna jeści prosta z dreva. Navat možna jaje padkidać i łavić rotam. Aryna tak rabiła, kali ŭ dziacinstvie viartałasia z treniroŭki. Voś takoje vitańnie ź dziacinstva.

A ŭ dvary paśpieli višni… Fota: youtube-kanał Aryny Sabalenki

Adna z babul Aryny žyvie ŭ pasiołku Pryvolny, što ŭ pradmieści Minska. Padčas sustrečy Aryna raskazała, što žyła z babulaj Ludmiłaj z 14 da 18 hadoŭ:

«Jana zastałasia adna, i mnie padałosia, što joj nievymoŭna adzinoka. Ja zachacieła zastacca ź joj, u nas vielmi blizkija adnosiny, jana mnie jak druhaja mama».

Dla babuli Aryna ŭ pieršuju čarhu lubimaje dzicia. Fota: youtube-kanał Aryny Sabalenki

Tut ža była i babula Tamara.

«Priviet, babuška!» — skazaŭ Hieorhias pa-rusku i abniaŭ jaje.

Hieorhias paznajomiŭsia z babulaj Aryny. Fota: youtube-kanał Aryny Sabalenki

U pakojach možna było zaŭvažyć šmat siamiejnych fatahrafij u ramačkach, u tym liku i Aryninych.

— Maja lubimica, maja załataja. Jak ja sumavała, — piaščotna skazała Ludmiła i abniała ŭnučku.

— Oj, nu tolki nie płakać, — paprasiła Aryna.

— Nie budu, — paabiacała babula.

Stoł, jaki byŭ nakryty ŭ haścioŭni, nahadaŭ by mnohim minčukam ich staryja siamiejnyja śviaty: sałaty, pirahi, bulbianoje piure, miasa… Usio smačna i prosta. Jak u dziacinstvie Aryny.

Aryna i Hieorhias usie stravy jeli z apietytam. Fota: youtube-kanał Aryny Sabalenki

«Babula pračynałasia razam sa mnoj i ładziła mnie šviedski stoł ź lubym śniadankam», — z uśmieškaj uzhadała tenisistka, jakaja ŭ hetym śviecie, napeŭna, pakaštavała ŭžo ŭsie stravy, jakija chacieła.

Aryna raskazała Hieorhiasu, jakija biełaruskija stravy pryhatavali babuli. Fota: youtube-kanał Aryny Sabalenki

Paśla pyšnaha zastolla dzieci i ŭnuki dapamahli babulam prybrać sa stała. Aryna i posud pamyła.

Chaj ty i zorka, a posud doma myć pavinna. Fota: youtube-kanał Aryny Sabalenki

«Ja radaja, što znajšła čas pryjechać i naviedać siamju. Jedu adsiul ź vielmi ciopłym pačućciom u sercy», — skazała Sabalenka.

Kamientary da artykuła