Udar pa Zaparožžy: hareli damy, handlovy centr i najstarejšy korpus univiersiteta
U noč suprać 21 vieraśnia rasijskija vojski atakavali Zaparožža ŭdarnymi bieśpiłotnikami. U horadzie prahrymieli vybuchi, jość trapleńni i paciarpiełyja, piša Bi-bi-si — Ukraina.
Pavodle źviestak Dziaržaŭnaj słužby pa nadzvyčajnych situacyjach, u vyniku ataki byli paškodžanyja dva žyłyja dzieviacipaviarchovyja damy. U ich uspychnuli pažary.
Taksama zahareŭsia handlovy centr. Na miescach trapleńniaŭ pracujuć ratavalniki i inšyja ekstrannyja słužby, jakija likvidujuć nastupstvy abstrełu.
U vyniku ataki paciarpieli piać čałaviek. Spačatku było viadoma pra adnaho traŭmavanaha, adnak paźniej kolkaść paciarpiełych pavialičyłasia.
Čatyry čałavieki atrymali traŭmy ŭ vyniku trapleńnia ŭ adzin z šmatpaviarchovikaŭ, jašče adzin čałaviek paciarpieŭ u inšym domie.
Siarod traŭmavanych — troje mužčyn i dźvie žančyny.
Paškodžany histaryčny korpus univiersiteta
Asobna rasijski ŭdar paškodziŭ adzin z karpusoŭ Zaparožskaha nacyjanalnaha ŭniviersiteta. Paśla trapleńnia tam uźnik maštabny pažar.
Pavodle źviestak miascovych krynic, havorka idzie pra treci navučalny korpus ZNU ŭ Alaksandraŭskim rajonie. Heta histaryčny budynak, uźviedzieny ŭ 1902 hodzie, dzie raniej znachodziłasia žanočaja himnazija.
Unačy vybuchi taksama prahrymieli ŭ Kijevie i vobłaści na fonie pahrozy ataki ŭdarnymi bieśpiłotnikami. U Bajarcy ŭźnik maštabny pažar na składach.
Rasijskija vojski taksama atakavali Sumy.
Pavodle słoŭ kiraŭnika abłasnoj vajennaj administracyi Aleha Hryhorava, dva varožyja drony ŭdaryli pobač z šmatkvaternym žyłym domam.
Paškodžanyja dom i piać aŭtamabilaŭ.
Zahinuła 38‑hadovaja žančyna. Jaje 41‑hadovaha muža sa šmatlikimi askiepkavymi ranieńniami špitalizavali.
Paźniej rasijskija vojski nanieśli ŭdar kiravanymi avijabombami pa terytoryi adnaho z univiersitetaŭ u Zarečnym rajonie Sumaŭ. Budynak zaznaŭ značnyja razbureńni. Pavodle papiarednich źviestak, abyšłosia biez paciarpiełych.