Ministr zamiežnych spraŭ Litvy prakamientavaŭ mahčymuju kalijnuju ździełku ZŠA ź Biełaruśsiu
«Niezaležna ad taho, chto źjaŭlajecca ŭładalnikam kalijnych uhnajeńniaŭ, niezaležna ad taho, jakaja kampanija ich adpraŭlaje, kalijnyja ŭhnajeńni, zdabytyja ŭ Biełarusi, nie mohuć apynucca na terytoryi ES».
Kiastucis Budrys. Fota: AP Photo / Mindaugas Kulbis
Učora prezident ZŠA Donald Tramp zajaviŭ, što pracuje nad uhodaj ź Biełaruśsiu, pavodle jakoj budzie kuplać kalijnyja ŭhnajeńni nižejšaj canoj, čym ZŠA atrymlivajuć z susiedniaj Kanady.
Ministr zamiežnych spraŭ Kiastucis Budrys prakamientavaŭ LRT, što heta sprava dvuchbakovych adnosin pamiž ZŠA i Biełaruśsiu, i naŭprost na Litvu heta, maŭlaŭ, nie ŭpłyvaje.
«Toje, što adbyvajecca pamiž ZŠA i Biełaruśsiu, — heta dvuchbakovyja dačynieńni, dačynieńni hetych dziaržaŭ. Jakija sankcyi ZŠA zdymajuć — heta naŭprost nie źviazana z tym, što robić Jeŭrapiejski sajuz, jakoj sankcyjnaj palityki jon prytrymlivajecca», — skazaŭ jon.
Na pytańnie, ci vykazvaŭ Vašynhton žadańnie, kab biełaruskija kalijnyja ŭhnajeńni ruchalisia na rynak ZŠA praz terytoryju Litvy abo litoŭskija party, Budrys kaža, što kansultavaŭ amierykanskich aficyjnych asob nakont taho, jak pracujuć sankcyi ES: «Ciapierašniaje rehulavańnie pry ŭviadzieńni sankcyj suprać Biełarusi praduhledžvaje, što na terytoryi ES nie moža być nijakich uhnajeńniaŭ. Heta achoplivaje i tranzit. Niezaležna ad taho, chto źjaŭlajecca ŭładalnikam kalijnych uhnajeńniaŭ, niezaležna ad taho, jakaja kampanija ich adpraŭlaje, u jakoj krainie jana ni była b zarehistravanaja, kalijnyja ŭhnajeńni, zdabytyja ŭ Biełarusi, nie mohuć apynucca na terytoryi ES», — kaža Budrys.
Tamu nivodnaja dziaržava ES siońnia nie moža być častkaj pahadnieńnia ab uhnajeńniach pamiž ZŠA i Biełaruśsiu, zapeŭnivaje ministr zamiežnych spraŭ Litvy.
Na pytańnie, ci akazvali ZŠA cisk na Litvu ci ES nakont pierahladu sankcyj suprać Biełarusi, Budrys kaža, što pryčyny, čamu suprać Biełarusi ŭviedzienyja sankcyi, zrazumiełyja — parušeńni pravoŭ čałavieka, razhrom apazicyi, padtrymka Rasii. «Pakul heta nie źmianiłasia, niama padstaŭ kazać, što sankcyi mohuć być pierahledžanyja. Ja siońnia nie baču nijakaj prastory dla debataŭ na hetuju temu», — zajaviŭ Budrys.
Čytajcie taksama:
Tramp nie paviedamlaŭ Litvie pra namier zaklučyć z Łukašenkam pahadnieńnie pa ŭhnajeńniach