Rubia raskazaŭ pra pierśpiektyvy enierhietyčnaha pieramirja pamiž Ukrainaj i Rasijaj

Złučanyja Štaty pasprabujuć damahčysia enierhietyčnaha pieramirja pamiž Ukrainaj i Rasijaj. Heta pytańnie, siarod inšaha, płanujecca abmierkavać padčas sustrečy prezidentaŭ ZŠA i Ukrainy Donalda Trampa i Uładzimira Zialenskaha. Pra heta dziaržsakratar ZŠA Marka Rubia zajaviŭ u intervju Fox News.

Marka Rubia. Fota: Chip Somodevilla / Getty Images

Pa słovach Rubia, niadaŭniaje pavyšeńnie cenaŭ na naftu i paliva było źviazana pieravažna z padziejami ŭ Čornym mory i rasijska-ŭkrainskaj vajnoj, a nie ź situacyjaj vakoł Irana.

Amierykanski dziaržsakratar adznačyŭ, što Ukraina tłumačyć svaje ŭdary nieabchodnaściu adkazvać na rasijskija rakietnyja ataki, u vyniku jakich hinuć mirnyja žychary. Pry hetym takija dziejańni majuć nastupstvy. Rubia zajaviŭ, što na praciahu apošnich miesiacaŭ źviazanyja z ZŠA sudny, jakija pieravoziać amierykanskuju naftu, stanavilisia celami ŭkrainskich atak, vierahodna, nienaŭmysna. Pavodle jaho, hetuju prablemu nieabchodna vyrašyć.

Rubia padkreśliŭ, što Tramp choča spynić vajnu i hatovy zrabić usio mahčymaje dla dasiahnieńnia hetaj mety. Jon pryznaŭ, što heta składany praces, ale vykazaŭ nadzieju na stanoŭčy vynik. Pa słovach dziaržsakratara, Rasija niasie vialikija straty, adnak Ukraina taksama sutykajecca ź ciažkimi nastupstvami vajny, tamu ZŠA chočuć spryjać jaje spynieńniu.

Rubia rastłumačyŭ, što pad enierhietyčnym pieramirjem majecca na ŭvazie spynieńnie ŭdaraŭ pa enierhietyčnaj infrastruktury. U pryvatnaści, nie pavinny atakavacca ni ŭkrainskija enierhietyčnyja abjekty, ni rasijskija abjekty enierhazabieśpiačeńnia.

ZŠA ličać takuju damoŭlenaść dobraj idejaj, hatovyja prapanavać jaje bakam i pasprabavać dasiahnuć pahadnieńnia. Marka Rubia paviedamiŭ, što hetaje pytańnie ŭžo abmiarkoŭvałasia ź niekalkimi krainami. Adnak, jak i ŭ vypadku z ahulnym spynieńniem vajny, dla enierhietyčnaha pieramirja nieabchodnaja zhoda abiedźviuch dziaržaŭ, što i stvaraje asnoŭnuju składanaść.

Zakranajučy situacyju na Blizkim Uschodzie, Rubia zajaviŭ, što jana palepšyłasia. Pavodle jaho, Armuzski praliŭ ačyščany ad min, a na suśvietny rynak ciapier pastupaje amal stolki ž nafty, kolki i da pačatku amierykanskaj apieracyi suprać Irana. Jon dadaŭ, što abjomy pastavak buduć pavialičvacca.

Pry hetym, jak śćviardžaje Rubia, Iran nie moža ekspartavać naftu praz amierykanskuju błakadu. Jon kaža, što suśvietny rynak atrymlivaje bolš nafty, a Iran nie atrymlivaje ad hetaha vyhady. Akramia taho, na iranskuju ekanomiku ŭzmacniajecca cisk praz sankcyi, jakija, jak zajaviŭ dziaržsakratar ZŠA, nanosiać joj značnuju škodu. Rubia prahnazuje, što ŭ najbližejšyja tydni stanovišča Irana budzie paharšacca: suśvietnyja pastaŭki nafty buduć raści, a Iran nie zmoža pradavać svaju naftu i budzie adčuvać nastupstvy sankcyj.

Kamientary da artykuła