Cichanoŭskaja: Ciapier nie čas handlavać z dyktatarami

Śviatłana Cichanoŭskaja zaklikała nie zaklučać handlovyja pahadnieńni ź biełaruskimi ŭładami na fonie anansavanaj ZŠA bujnoj ździełki pa zakupcy biełaruskich kalijnych uhnajeńniaŭ. Pra heta lidarka biełaruskich demakratyčnych sił zajaviła 22 vieraśnia ŭ intervju Deutsche Welle na palach Hienieralnaj asamblei AAN u Ńju-Jorku.

Śviatłana Cichanoŭskaja. Fota: «Naša Niva»

«Moj pasył taki: ciapier nie čas handlavać z dyktatarami», — skazała Cichanoŭskaja.

Jana padziakavała śpiecpasłańniku prezidenta ZŠA Džonu Koŭłu za namahańni dziela vyzvaleńnia jašče 25 biełaruskich palitviaźniaŭ. Pry hetym Cichanoŭskaja padkreśliła, što važna, kab humanitarny kirunak nie pieraros u palityčny i kab Alaksandra Łukašenku nie pryznali prezidentam Biełarusi, bo biełaruski narod jaho nie padtrymlivaje.

Lidarka biełaruskich demakratyčnych sił vykazała spadziavańnie, što administracyja Donalda Trampa zmoža damahčysia vyzvaleńnia ŭsich biełaruskich palitviaźniaŭ, nie robiačy pry hetym, na jaje dumku, praźmiernych sastupak Łukašenku.

U razmovie z DW Cichanoŭskaja taksama zajaviła, što situacyja ŭ Biełarusi źjaŭlajecca pytańniem biaśpieki ŭsiaho rehijonu. Jana zaklikała zachodnija krainy, padtrymlivajučy Ukrainu, adnačasova ŭličvać i biełaruski aśpiekt.

Pavodle jaje, pry vyrašeńni pytańnia vajny va Ukrainie nieabchodna nie vypuskać z uvahi Biełaruś. Cichanoŭskaja zajaviła, što nielha dapuścić straty niezaležnaści krainy, a Łukašenka, pavodle jaje słoŭ, «raspradaje» suvierenitet Biełarusi Rasii.

Kamientary da artykuła