Rasijski vajskovy viertalot zranku biez nastupstvaŭ zalacieŭ u pavietranuju prastoru Polščy

Rasijski viertalot Mi-8 parušyŭ pavietranuju prastoru Polščy, zalacieŭšy z boku Kalininhradskaj vobłaści. Pra heta paviedamiła Apieratyŭnaje kamandavańnie Uzbrojenych sił Polščy.

Viertalot Mi-8. Zdymak ilustracyjny. Fota: Wikimedia Commons

Pavodle polskich vajskoŭcaŭ, viertalot zalacieŭ prykładna na 300 mietraŭ uhłyb polskaj terytoryi ŭ rajonie horada Branieva i znachodziŭsia tam kala 42 siekundaŭ. U adkaz Polšča padniała ŭ pavietra dziažurnyja źniščalniki, a naziemnyja padraździaleńni supraćpavietranaj abarony pryviała ŭ stan pavyšanaj hatoŭnaści.

U polskaj armii ličać, što hety incydent moh być čarhovaj pravierkaj hatoŭnaści polskaj sistemy supraćpavietranaj abarony z boku Rasii.

«Charaktar incydentu śviedčyć pra toje, što Rasija čarhovy raz praviaraje bojehatoŭnaść našaj sistemy pavietranaj abarony, — padkreślili ŭ kamandavańni. — Piersanał, jaki adkazvaje za pracu polskaj sistemy SPA, viadzie kruhłasutačnaje nazirańnie i znachodzicca ŭ pastajannaj hatoŭnaści, kab harantavać biaśpieku polskaj pavietranaj prastory».

Raniej rasijskija ŭdary bieśpiłotnikami nieadnarazova adbyvalisia ŭsiaho za niekalki kiłamietraŭ ad polskaj miažy. U takich vypadkach Polšča taksama padymała źniščalniki i pryvodziła srodki SPA ŭ hatoŭnaść.

U vieraśni rasijskija bieśpiłotniki atakavali ciahnik i aŭtazapraŭku kala pamiežnych pierachodaŭ. Paśla hetaha polskija ŭłady pačali dadatkova ŭmacoŭvać miažu.

Kamientary da artykuła