Na tarhach pradali zakinuty sanatoryj pad Rakavam

Zakinuty sanatorny kompleks na samym zachadzie Minskaha rajona, budaŭnictva jakoha pačali jašče ŭ kancy savieckaha pieryjadu, 23 vieraśnia pradali na aŭkcyjonie. Jaho nabyŭ pryvatny inviestar za 214 273,83 rubla — heta kala 71 tysiačy dalaraŭ pavodle kursu Nacyjanalnaha banka. Na tarhi zajaviŭsia tolki adzin udzielnik, tamu pieramovy zaviaršylisia chutka. Pieramožcam stała fizičnaja asoba z ahraharadka Ždanovičy, paviedamlaje Domovita.by.

Fota: et.butb.by

Kupiec atrymaŭ kompleks z dvuch budynkaŭ ahulnaj płoščaj amal 9 tysiač kvadratnych mietraŭ i ziamielnym učastkam płoščaj kala 4 hiektaraŭ.

Hałoŭny budynak zajmaje kala 6700 kvadratnych mietraŭ i źvierchu nahadvaje vializnuju trochpramianiovuju zorku. Pavodle pieršapačatkovaha prajekta, tam pavinny byli raźmiaščacca spa-zona, lačebnyja kabiniety i vialiki basiejn. Budaŭniki paśpieli ŭźvieści cahlanyja ścieny i pierakryćci, davioŭšy hatoŭnaść abjekta prykładna da 51%.

Druhi korpus maje płošču kala 2100 kvadratnych mietraŭ. Jon pryznačaŭsia dla raźmiaščeńnia adpačyvalnikaŭ, a stupień jaho hatoŭnaści składaje amal 69%. U budynku płanavalisia zvyčajnyja hatelnyja numary ź vidam na sasnovy les. Niahledziačy na šmathadovy prastoj, ścieny i bietonnyja pierakryćci abodvuch karpusoŭ, pavodle apisańnia abjekta, zachavalisia ŭ dastatkova dobrym stanie.

Ziamielny ŭčastak płoščaj kala 4 hiektaraŭ pieradajecca novamu ŭładalniku ŭ arendu na 30 hadoŭ z mahčymaściu padaŭžeńnia. Jon znachodzicca siarod lesu, niedaloka ad raki Čarnaruč i vadaschovišča Kryłava. Vykarystoŭvać ziamlu možna tolki dla sanatorna-kurortnaha lačeńnia, azdaraŭleńnia, turyzmu abo sportu.

Kompleks pačali budavać u kancy 1980‑ch hadoŭ, kali savieckija viedamstvy aktyŭna stvarali zaharadnyja pansijanaty dla azdaraŭleńnia svaich supracoŭnikaŭ. Adnak paśla pierabudovy i raspadu SSSR dziaržaŭnaje finansavańnie spyniłasia, tamu budaŭnictva zastałosia niezavieršanym. Jakoje mienavita viedamstva ci pradpryjemstva było zakazčykam, u aficyjnych dakumientach nie ŭdakładniajecca.

Na praciahu nastupnych hadoŭ kompleks znachodziŭsia na bałansie Haranskaha sielsavieta i pastupova staŭ miascovaj słavutaściu. U 2000‑ia hady niedabudavanyja budynki vykarystoŭvali amatary strajkbołu i hraficisty. Abjekt taksama pryciahvaŭ stałkieraŭ svaim vyhladam zakinutaha savieckaha sanatoryja.

Kompleks znachodzicca prykładna za 30 kiłamietraŭ ad Minska. Pobač prachodziać Hrodzienskaja trasa i MKAD-2.

Fota: et.butb.by

Znajści inviestara dla daŭhabuda ŭłady sprabavali niekalki hadoŭ. Kompleks vystaŭlali na tarhi ŭ 2022 hodzie i letam 2026 hoda, ale kupiec znajšoŭsia tolki ciapier. Pakolki na ciapierašni aŭkcyjon pastupiła tolki adna zajaŭka, abjekt pradali z 5‑pracentnaj nadbaŭkaj da pačatkovaj cany. Startavy košt składaŭ 204 070,31 rubla, a kančatkovy — 214 273,83 rubla.

Ciapier novamu ŭładalniku treba budzie vyznačycca z dalejšym losam kompleksu. Dla adnaŭleńnia spatrebiacca značnyja ŭkładańni: nieabchodna pravieści kamunikacyi, adramantavać dach, pastavić vokny i całkam vykanać unutranaje azdableńnie. Kali prajekt budzie realizavany, kala Minska moža źjavicca zaharadny hatel, baza adpačynku abo azdaraŭlenčy centr.

Kamientary da artykuła