Paśla sustrečy ź Cichanoŭskaj premjer Słavienii zhadaŭ Biełaruś z trybuny Hienasamblei AAN
Premjer-ministr Słavienii Janez Janša padčas vystupu na Hienieralnaj asamblei AAN zajaviŭ pra nieabchodnaść vyzvaleńnia ŭsich biełaruskich palitviaźniaŭ i padtrymaŭ demakratyčnyja pieramieny ŭ Biełarusi.
Premjer-ministr Słavienii Janez Janša. Fota: UN Photo
Premjer-ministr Słavienii Janez Janša vystupiŭ 24 vieraśnia ŭ Ńju-Jorku na ahulnych debatach 81‑j siesii Hienieralnaj asamblei AAN, jakaja sioleta prachodzić pad devizam «Adnaŭleńnie davieru, kiravańnie transfarmacyjaj: Arhanizacyja Abjadnanych Nacyj, jakaja pracuje na karyść usich».
Adnoj z hałoŭnych tem vystupu premjer-ministra Słavienii stali padvojnyja standarty ŭ reakcyi mižnarodnaj supolnaści na kryzisy i parušeńni pravoŭ čałavieka ŭ roznych krainach. Janša zajaviŭ, što pryncypy, na jakich zasnavanaja AAN, hublajuć sens, kali prymianiajucca vybaračna.
U hetym kantekście jon asobna zahavaryŭ pra Biełaruś.
«Hetyja pryncypy pavinny taksama kiravać našym padychodam da Biełarusi. My asudžajem sistemnyja represii z boku ŭładaŭ, advolnyja zatrymańni i pieraśled palityčnych apanientaŭ, pravaabaroncaŭ i niezaležnych hałasoŭ.
Usie palityčnyja źniavolenyja pavinny być nieadkładna i biezumoŭna vyzvalenyja, a vinavatyja ŭ parušeńniach pravoŭ čałavieka — pryciahnutyja da adkaznaści. My pavinny pra heta havaryć», — zajaviŭ Janša.
Jon dadaŭ, što Słavienija padtrymlivaje biełaruski narod i mirnyja demakratyčnyja pieramieny, zasnavanyja na svabodnych i spraviadlivych vybarach, viaršenstvie prava i pavazie da pravoŭ čałavieka.
«Biełaruś naležyć da svabodnaj i demakratyčnaj Jeŭropy», — skazaŭ słavienski premjer.
Nahadajem, što napiaredadni na palach Hienasamblei Janez Janša sustreŭsia sa Śviatłanaj Cichanoŭskaj. Baki abmierkavali situacyju ź biaśpiekaj u Biełarusi i rehijonie, zaležnaść režymu Łukašenki ad Rasii i militaryzacyju Biełarusi.
Asobnaj temaj stała vyzvaleńnie palitviaźniaŭ i dapamoha im. Havorka išła taksama pra biełaruskuju dyjasparu, niezaležnyja miedyja i represavanych, mahčymaść stvareńnia ŭ słavienskim parłamiencie hrupy siabroŭ demakratyčnaj Biełarusi i pryznačeńnia śpiecyjalnaha pradstaŭnika pa suviaziach ź biełaruskimi demakratyčnymi siłami.
Dzianis Kučynski, Franak Viačorka i Śviatłana Cichanoŭskaja padčas sustrečy ŭ Ńju-Jorku z premjer-ministram Słavienii Janezam Janšam. Fota: tsikhanouskaya.org
Janša viarnuŭsia na pasadu kiraŭnika ŭrada ŭ červieni 2026 hoda. Heta jaho čaćviorty termin na pasadzie premjera.
Jak piša sajt Ofisa, Cichanoŭskaja i Janša ŭžo sustrakalisia ŭ 2021 hodzie, kali jon taksama ŭznačalvaŭ urad Słavienii.
Padčas ciapierašniaj sustrečy Cichanoŭskaja padziakavała Janšu za padtrymku biełarusaŭ u 2021 hodzie, a Słavienii — za dapamohu biełaruskaj hramadzianskaj supolnaści, demakratyčnym siłam i niezaležnym miedyja. Kraina praciahvała publična padtrymlivać ich i ŭ nastupnyja hady.