Bloomberg: Tramp prapanavaŭ Zialenskamu pravieści sustreču z Pucinym u Maskvie

dapoŭniena

Prezident ZŠA Donald Tramp padčas sustrečy z Uładzimiram Zialenskim na palach Hienieralnaj asamblei AAN prapanavaŭ prezidentu Ukrainy pravieści sustreču z Uładzimiram Pucinym u Maskvie. Pra heta 25 vieraśnia paviedamiła ahienctva Bloomberg sa spasyłkaj na svaje krynicy.

Zdymak ilustracyjny. Fota: vecteezy.com

Pavodle surazmoŭcaŭ ahienctva, Zialenski adchiliŭ prapanovu Trampa. Jana, jak śćviardžajecca, vyklikała niezadavolenaść ukrainskaha prezidenta.

Nieŭzabavie, adnak, karespandent vydańnia Financial Times Krystafier Miler asprečyŭ hetuju infarmacyju:

«U ofisie Uładzimira Zialenskaha, u tym liku čynoŭniki, jakija prysutničali na sustrečy, paviedamlajuć mnie, što hetaha nie było; padčas ich sustrečy ŭ AAN Tramp nie zaklikaŭ prezidenta Ukrainy sustrecca z Pucinym u Maskvie. Lidary dźviuch krain abmierkavali patencyjnyja budučyja trochbakovyja pieramovy, ale toje, što apisana ŭ artykule [Bloomberg], nie adbyvałasia».

«Heta niepraŭdzivaja infarmacyja», — paviedamiŭ paśla žurnalistam i daradca ŭkrainskaha prezidenta Dźmitryj Litvin.

Raniej Pucin užo zajaŭlaŭ pra hatoŭnaść pryniać Zialenskaha ŭ Maskvie. Zialenski ŭ adkaz nazyvaŭ takija zaprašeńni «hulniami» i prapanoŭvaŭ pravieści sustreču ŭ niejtralnaj krainie. Siarod mahčymych miescaŭ jon nazyvaŭ Šviejcaryju i Turcyju.

23 vieraśnia, adkazvajučy na pytańni rasijskich prapahandystaŭ, kali jon pryjedzie ŭ Maskvu, Zialenski skazaŭ, što moža prylacieć «na rakiecie».

Kamientary da artykuła