Nie tolki Geely. Jakija jašče kitajskija aŭto stali papularnyja ŭ Biełarusi
Kitajska-biełaruskija Geely/Belgee užo nie pieršy hod zajmajuć bolš za 50% prodažaŭ novych aŭto ŭ Biełarusi, ale jość inšyja kitajskija brendy, jakija taksama karystajucca ŭ nas vialikim popytam.
Ilustracyjnaje fota: Naša Niva
Dongfeng — novaja narodnaja marka?
Druhim pa papularnaści kitajskim brendam u Biełarusi źjaŭlajecca marka Dongfeng. U 2024 hodzie pa kolkaści rehistracyj novych mašyn Dongfeng sastupaŭ tolki Geely/Belgee i Lada. Tady było pradadziena bolš za 3500 mašyn, i heta z ulikam taho, što ŭ krainu marka pryjšła tolki ŭ 2023 hodzie.
Za 2025 hod prodažy Dongfeng — u pierakładzie z kitajskaj hetaje słova aznačaje «ŭschodni viecier» — u Biełarusi vyraśli da 5040 aŭto za hod. Praŭda, niahledziačy na značny rost prodažaŭ, letaś marka pa papularnaści spuściłasia z treciaj na čaćviortuju pazicyju.
U 2023—2024 hadach samaj pradavanaj madellu byŭ bienzinavy krasovier Dongfeng Shine GS.
U 2025‑m najbolš papularnaj madellu staŭ kampaktny elektramabil Dongfeng BOX: tolki letaś u Biełarusi było zarehistravana kala 2650 ekzemplaraŭ — bolš za 50% ad usich novych rehistracyj aŭto marki Dongfeng.
Dongfeng BOX ciapier pradajecca pa cenach ad 48 800 rubloŭ (kala 16 250 dalaraŭ).
Dongfeng BOX. Fota: av.by
Taksama ŭ top-3 Dongfeng trapiŭ siedan Shine, jaki pradajecca z 1,5‑litrovym bienzinavym ruchavikom.
Praryŭ hoda: BYD
Kitajski vytvorca BYD letaś u śviecie abyšoŭ pa prodažach elektramabilaŭ papiaredniaha lidara — amierykanskuju Tesla. A ŭ Biełarusi zaniaŭ treci radok pa papularnaści.
Tolki letaś u Biełarusi było zarehistravana bolš za 6600 mašyn BYD.
Samaja papularnaja madel — elektryčny krosovier Song Plus. Letaś ich zarehistravali 2610 štuk.
BYD Song Plus EV. Fota: av.by
Na druhim miescy pa papularnaści idzie kampaktny elektrakrasovier Yuan Up — 1240 štuk.
Ahułam za minuły hod aŭtamabili marki BYD zaniali piać pazicyj u top-10 samych papularnych novych elektramabilaŭ, pradadzienych u Biełarusi.
Kolkaść abjaŭ pra prodaž patrymanych aŭto na av.by taksama pakazvaje, što BYD — vielmi papularnaja marka, bo pa kolkaści prapanoŭ sastupaje tolki Geely/Belgee i Dongfeng.
Voyah — adna madel, zatoje jakaja!
Voyah sa svaim parkietnikam Free trapiŭ u top-10 samych pradavanych lehkavych aŭto ŭ Biełarusi jašče ŭ 2023 hodzie.
U 2025‑m u krainie zarehistravali 2530 novych Voyah, a marka zaniała piatuju pazicyju pa papularnaści.
Voyah Free. Fota: av.by
Ale tut varta razumieć, što Voyah dla biełarusaŭ — heta faktyčna adna madel Free, bo z 2530 usich Voyah 2430 pryjšłosia mienavita na jaje. Siarod patrymanych aŭto karcina adpaviedna takaja samaja: z 82 mašyn u prodažy na av.by 71 — heta Voyah Free.
Haval (pravał) hoda
Pa vynikach 2024 hoda Haval zajmaŭ piaty radok pa papularnaści z 2217 novymi aŭto za hod. Ale ŭžo letaś marka vypała navat z top-10, zaniaŭšy ŭsiaho 13‑y radok z 760 rehistracyjami novych mašyn.
Haval F7. Fota: av.by
Heta vielmi niebiaśpiečny zvanočak dla brenda. Vyhladaje, što z prychodam šerahu novych kitajskich marak značnaja častka ludziej zamiest Haval abrała aŭto inšych vytvorcaŭ.
Kitajski premium
Dakładna vyznačyć, jakaja kitajskaja marka pa pravie moža zamykać top-5, niaprosta, bo nie ŭsie brendy mohuć stabilna ŭtrymlivać pazicyi.
Ale pa sukupnaści faktaraŭ u piaciorku lidaraŭ možna ŭklučyć Li Auto — kitajski premijalny brend, jaki nie maje biudžetnych aŭto ŭ liniejcy. Samaja tannaja madel u liniejcy Li kaštuje ad 138 000 rubloŭ (kala 46 tysiač dalaraŭ).
Li Auto L6. Fota: av.by
Letaś u Biełarusi było zarehistravana kala 2230 aŭto marki Li. Camaja papularnaja ź ich — L6. Ciapier ceny na biestsieler minułaha hoda L6 pačynajucca z 198 tysiač rubloŭ, što kala 66 tysiač dalaraŭ.