Vučyč pajšoŭ u adstaŭku z pasady prezidenta Sierbii. Kab stać premjeram
Sierbski prezident nie dapracavaŭ da kanca druhoha terminu, kab zastacca pry ŭładzie.
Alaksandr Vučyč. Fota: AP Photo / Darko Vojinovic
Alaksandr Vučyč u zvarocie da nacyi abviaściŭ, što sychodzić u adstaŭku z pasady prezidenta Sierbii. Da kanca jahonaha druhoha terminu zastavałasia krychu bolš za paŭhoda.
«Ja ŭdziačny hramadzianam, jakija dvojčy akazali mnie davier. Siońnia ja padaju ŭ adstaŭku», — zajaviŭ Vučyč.
Palityk daterminova syšoŭ z pasady prezidenta, kab pasprabavać zachavać uładu. Pavodle Kanstytucyi, adzin čałaviek nie moža być prezidentam bolš za dva terminy, tamu Vučyč choča pierasieści ŭ kresła premjer-ministra.
Užo były prezident uznačalić śpis kirujučaj Sierbskaj prahresiŭnaj partyi na daterminovych parłamienckich vybarach 25 kastryčnika. Kali partyja znoŭ pieramoža, Vučyč uznačalić urad. Jon užo byŭ premjer-ministram u 2014—2017 hadach.
Upieršyniu Vučyč abviaściŭ pra budučuju adstaŭku na fonie masavych pratestaŭ, jakija achapili Sierbiju ŭ 2024 hodzie. Ich pryčynaj stała trahiedyja ŭ Novi-Sadzie, dzie ŭ vyniku abvału naviesa na niadaŭna rekanstrujavanym čyhunačnym vakzale zahinuli 16 čałaviek. Adnym z patrabavańniaŭ pratestoŭcaŭ suprać karupcyi va ŭładzie była adstaŭka Vučyča. Z taho času jon niekalki razoŭ zajaŭlaŭ, što nie źbirajecca mianiać Kanstytucyju, kab zastacca na pasadzie prezidenta.