JAC, BMG, Citroen i nie tolki. Jakija jašče marki aŭto źbirajuć u Biełarusi — aproč Geely
Kali vy dumajecie, što ŭ Biełarusi źbirajuć tolki Geely/Belgee, to hłyboka pamylajeciesia.
Ilustracyjny zdymak. Fota: onliner.by
Nie ŭsie kitajskija marki adnolkava paśpiachovyja
Z momantu pačatku sieryjnaj zborki Geely ŭ Biełarusi prajšło ŭžo bolš za 13 hadoŭ. Za hety čas paśpieŭ źjavicca subbrend Belgee, a aŭtamabili marak Geely/Belgee stali sapraŭdy narodnymi.
Admietna, što amal paralelna z Geely u Biełarusi pačali źbirać inšyja kitajskija aŭto — Zotye. Praŭda, prajekt akazaŭsia kudy mienš paśpiachovym, i zborka Zotye praciahvałasia ŭsiaho kala siem hadoŭ — z 2013‑ha pa 2020 hod.
Tym nie mienš, biełaruskaja aŭtavytvorčaść nie abmiažoŭvajecca tolki vypuskam Geely/Belgee.
Dongfeng
Aŭtamabili hetaj kitajskaj marki pačali źbirać na zavodzie «Junisan» u Abčaku (Minski rajon) tolki vosieńniu 2025 hoda, ale ŭsiaho za hod jany zmahli dasiahnuć značnych pośpiechaŭ.
Za pieršaje paŭhodździe 2026 hoda było vypuščana bolš za 1500 aŭto marki Dongfeng z paznakaj «zroblena ŭ Biełarusi».
Siedan Dongfeng Shine Max. Skrynšot: dongfeng.by
Pakul u liniejcy Dongfeng biełaruskaj zborki čatyry madeli: krasovier Shine GS, jaki pradajecca pa cenach ad 65 tysiač rubloŭ (kala $21 700), siedan Shine Max koštam ad 72 tysiač rubloŭ (kala $24 000), krasovier Mage pa cenach ad 77 tysiač rubloŭ (kala $25 700) i vialiki parkietnik Huge, dastupny pa cenach ad 95 300 rubloŭ (kala $31 800).
Forthing
Marka Forthing naležyć da kancerna Dongfeng Motor. Krasovier Forthing T5 EVO, jaki niadaŭna pačali źbirać u Biełarusi, pradajecca pa cenach ad 80 tysiač rubloŭ (kala $26 600). Za dva hady prysutnaści brenda na biełaruskim rynku dylery realizavali ŭžo 1000 aŭto. Praŭda, biełaruskaj zborki ź ich mienš za 200 štuk.
JAC
Jašče adna kitajskaja marka, mašyny jakoj źbirajuć u Biełarusi, — JAC. Praŭda, u adroźnieńnie ad vyšejpieraličanych marak, JAC vypuskaje ŭ tym liku kamiercyjny transpart. Pikapy źbirajuć na «Junisonie», a hruzaviki — u Breście na «Brestmašy».
Skrynšot: jacauto.by
Jak i inšyja aŭto biełaruskaj zborki, jany pradajucca ŭ tym liku z vykarystańniem ilhotnaha kredytavańnia.
Samy dastupny pikap JAC T8 Pro kaštuje ad 113 800 rubloŭ (kala $38 000) i maje dyzielny ruchavik abjomam 2 litry.
Pikap T9 kaštuje ad 133 tysiač ($44 300) za bienzinavuju viersiju i ad 138 tysiač (kala $46 000) za dyzielnuju.
Shineray
Aproč hetaha, u Abčaku źbirajuć mikraaŭtobusy marki Shineray — hruzavyja, pasažyrskija i hruzapasažyrskija.
Praŭda, abjomy prodažaŭ u Shineray davoli ścipłyja. Za pieršaje paŭhodździe 2026 hoda ŭ Biełarusi było sabrana kala 50 mikraaŭtobusaŭ.
BMG i znoŭ «Brestmaš»
Aproč hruzavikoŭ JAC, u Breście ad pačatku 2025 hoda źbirajuć mikraaŭtobusy marki BMG, jakija taksama majuć viersii dla pieravozki pasažyraŭ i hruzaŭ.
BMG M5. Fota: av.by
Abjomy vypusku — kala 10 mašyn u miesiac.
Tamu vyhladaje, što prynamsi pakul siarod kitajskich marak, aproč Geely/Belgee niejkuju značnuju prysutnaść majuć tolki Dongfeng, Forthing i JAC.
Nie tolki kitajskija marki
Hetym letam na «Junisonie» pačali źbirać adrazu try madeli Citroen. Praŭda, i tut biez Kitaja nie abyšłosia, bo havorka idzie pra madeli, jakija vypuskaje sumiesnaje z kitajcami Dongfeng Peugeot Citroen Automobile Company LTD.
Madelny šerah Citroen biełaruskaj zborki. Skrynšot: citroen-avto.by
Samy dastupny — kampaktny chetčbek Citroen C 3‑XR — pradajecca pa cenach ad 75 tysiač rubloŭ (kala $25 000).
Ceny na Citroen C5 Aircross pačynajucca z 95 tysiač rubloŭ, ci kala $31 700.
Ceny na C5X, sabranyja ŭ Biełarusi, pry ich źjaŭleńni pačynalisia z 96 tysiač rubloŭ (kala $32 000). Adnak ciapier na sajcie pradaŭca paznačana, što ŭ najaŭnaści takich mašyn niama i dastupny jany tolki pad zamovu z zavodu.
Što pakazvajuć prodažy?
Pa miery pašyreńnia madelnaha šerahu prodažy mašyn biełaruskaj zborki rastuć. Tolki za šeść miesiacaŭ 2026 hoda było sabrana 18 347 adzinak, što na 60% bolš, čym za pieršaje paŭhodździe 2025 hoda (11 442 adzinki). Praŭda, asnoŭny pryrost daje Geely/Belgee. Što da novych marak, to najlepšaja dynamika ŭ Dongfeng i Forthing, jakija naležać kancernu Dongfeng Motor. Vyhladaje, što mienavita jany buduć stvarać sapraŭdnuju kankurencyju dla Geely/Belgee.
I kali pazityŭnaja dynamika zachavajecca, to Dongfeng Motor moža stać pieršym sapraŭdy ŭdałym prajektam dla šmatpakutnaha zavoda «Junison», na mahutnaściach jakoha jakija aŭto tolki nie źbirali.
Ilustracyjny zdymak. Fota: «ZAT «Junisan» / Evgenij Pronovich
Daviedka pra «Junison»
Na zavodzie ŭ Abčaku ź pieramiennym pośpiecham źbirajuć aŭtamabili roznych marak užo na praciahu troch dziesiacihodździaŭ.
Pačynałasia ŭsio z Ford. Amierykancy dali kanviejer dla zborki aŭtamabilaŭ, a taksama ŭkłali kala $10 miljonaŭ, naładziŭšy ŭ 1997 hodzie vypusk mikraaŭtobusaŭ Ford Transit i lehkavikoŭ Ford Escort. Płanavałasia, što štohod pradpryjemstva budzie vypuskać kala 6300 mašyn, asnoŭnaja častka jakich pryznačałasia dla prodažu ŭ Rasii.
Ale da zvaročvańnia vytvorčaści ŭ 2000‑m u Biełarusi ŭdałosia sabrać usiaho kala 3600 aŭto marki Ford.
Paźniej u Abčaku źbirali polskija mikraaŭtobusy «Lublin», iranskija «Samandy», kitajskija Zotye, Opel Mokka / Chevrolet Tracker i navat Chevrolet Tahoe dy Cadillac Escalade.
Cadillac Escalade biełaruskaj zborki. Fota: abw.by
Adnak nivodny z prajektaŭ nie zmoh stać doŭhatryvałym i paśpiachovym.
Mahčyma, u vypadku z Dongfeng narešcie ŭsio atrymajecca, i zavod «Junison» zmoža pazbavicca asacyjacyi z praklatym miescam, dzie kožny zapusk zborki novaj marki aŭto z časam ciarpić fijaska.