Piaciarych kalinoŭcaŭ zavočna asudzili na 12 i 20 hadoŭ
Minski haradski sud 14 vieraśnia zavočna vynies prysud piaci biełarusam. Juryja Makitava asudzili na 20 hadoŭ kałonii, Kryścinu Stankievič, Michaiła Čuprynskaha, Mikałaja Bojku i byłuju palitźniavolenuju Natallu Nikicinu — na 12 hadoŭ.
Im inkryminavali šerah artykułaŭ Kryminalnaha kodeksa: č. 2 art. 285 (udzieł u złačynnaj arhanizacyi), č. 2 art. 290‑5 (udzieł u terarystyčnaj arhanizacyi), č. 1 art. 357 (zmova abo inšyja dziejańni, ździejśnienyja z metaj zachopu ŭłady), č. 3 art. 361‑1 (udzieł u ekstremisckim farmavańni), č. 1 i č. 2 art. 361‑3 (udzieł na terytoryi zamiežnaj dziaržavy va ŭzbrojenym farmavańni abo ŭzbrojenym kanflikcie, vajennych dziejańniaŭ, viarboŭka abo padrychtoŭka asob da takoha ŭdziełu), č. 1 i č. 2 art. 361‑4 (sadziejničańnie ekstremisckaj dziejnaści) i art. 361‑5 (prachodžańnie navučańnia abo inšaj padrychtoŭki dla ŭdziełu ŭ ekstremisckaj dziejnaści), paviedamlaje «Viasna».
U mai 2026 hoda Śledčy kamitet raspačaŭ u dačynieńni da piaci čałaviek śpiecyjalnuju vytvorčaść — praceduru, jakaja dazvalaje rasśledavać i razhladać kryminalnuju spravu bieź fizičnaj prysutnaści abvinavačanaha ŭ Biełarusi. U červieni rasśledavańnie skončyli i pieradali spravu hienieralnamu prakuroru dla nakiravańnia ŭ sud. A 20 žniŭnia ŭ Minskim haradskim sudzie pačaŭsia zavočny praces.
Usich piaciarych sud źviazaŭ z Pałkom imia Kastusia Kalinoŭskaha. Jany znachodziacca za miežami Biełarusi, tamu sud prachodziŭ u paradku śpiecyjalnaj vytvorčaści. Takaja pracedura prymianiajecca ŭ dačynieńni da ludziej, jakija znachodziacca pa-za miežami krainy i nie źjaŭlajucca pa vyklikach śledstva abo suda.