Ukraina paškodziła piać cechaŭ na zavodzie pa vytvorčaści kampanientaŭ dla «Arešnika» i inšych rakiet

U Rastoŭskaj vobłaści ŭ vyniku ŭdaru Uzbrojenych sił Ukrainy pa Azoŭskim optyka-miechaničnym zavodzie (AOMZ) u noč na 26 vieraśnia byli paškodžanyja piać vytvorčych cechaŭ. Razbureńni zafiksavanyja na spadarožnikavych zdymkach, piša The Moscow Times.

Fota: t.me/V_Zelenskiy_official

U liciejnym cechu bačnyja ślady pažaru i značnyja paškodžańni dvuch budynkaŭ. U miechaničnym cechu častkova abvaliŭsia dach. Taksama surjozna paciarpieli cechi, dzie vyrablajuć optyku, zborny i halvaničny cechi.

Słužba biaśpieki Ukrainy paćvierdziła ŭdar pa AOMZ. Pavodle jaje infarmacyi, dla ataki vykarystoŭvalisia ŭkrainskija kryłatyja rakiety «Nieptun», a taksama reaktyŭnyja drony «Ruta», «Palanica» i «Bars».

Zavod uvachodzić u karparacyju «Taktyčnaje rakietnaje ŭzbrajeńnie». Pavodle rasśledavańnia Dallas Analytics, AOMZ udzielničaje ŭ vytvorčych łancužkach jak minimum siami rasijskich rakietnych prahram. Siarod ich — dalnabojnyja rakiety «pavietra — pavietra» R-37M, stratehičnyja kryłatyja rakiety Ch-101 i balistyčnaja rakieta «Arešnik».

Pradpryjemstva vyrablaje dla hetych i inšych rakiet radyjołakacyjnyja i infračyrvonyja hałoŭki samanaviadzieńnia, błoki aŭtamatyki palotu, kabielnyja žhuty, korpusy i kamutacyjnyja vuzły. Taksama zavod vypuskaje kampanienty dla kiravanych avijabombaŭ i abstalavańnie dla aerakaśmičnaha kompleksu.

Siarod śpiecyjalizavanaj pradukcyi AOMZ — navihacyjny lidar «Vodblisk» i błok aŭtamatyki palotu dla rakiety Ch-101. «Vodblisk» dazvalaje rakiecie aryjentavacca va ŭmovach padaŭleńnia spadarožnikavaha sihnału srodkami radyjoelektronnaj baraćby, a błok aŭtamatyki kiruje sistemami rakiety i jaje rulavymi pavierchniami.

Ź viasny 2022 hoda AOMZ znachodzicca pad sankcyjami ZŠA. Abmiežavańni suprać pradpryjemstva taksama ŭviali Jeŭrasajuz, Vialikabrytanija, Kanada, Japonija, Šviejcaryja, Aŭstralija i Novaja Ziełandyja.

Kamientary da artykuła