U Minsku źjaviŭsia tajamničy tralejbus, dla prajezdu ŭ jakim patrebnyja dva tałončyki
U Threads abmiarkoŭvajuć situacyju z tralejbusami №22, 40 i 40A.
Pasažyry zaŭvažyli niezvyčajnuju situacyju: možna jechać na adnym i tym ža tralejbusie praz «Kachoŭskuju», nikudy nie vychodziačy, ale za prajezd usio roŭna daviadziecca zapłacić dvojčy, piša Onliner.by.
Tak adbyvajecca tamu, što z-za budaŭničych rabot źmianiłasia schiema ruchu tralejbusaŭ. Raniej «Kachoŭskaja» była zvyčajnym prypynkam pa maršrucie, a kancavym dla №40, naprykład, była DS «Karastajanavaj».
Zaraz tralejbusy iduć ad Kamaroŭskaha rynku praz Bahdanoviča i Kulman da «Kachoŭskaj», jakaja pavodle pašparta maršrutu ličycca kancavym prypynkam.
Paśla hetaha toj ža tralejbus praciahvaje ruch pa bulvary Šaŭčenki i vulicy Viery Charužaj.
U «Minsktransie», adkaz jakoha apublikavała karystalnica Threads, patłumačyli: na «Kachoŭskaj» zakančvajecca ruch u adnym napramku i pačynajecca zvarotny.
Tamu, kali pasažyr jedzie, naprykład, ad Kamaroŭskaha rynku da Krapotkina praz «Kachoŭskuju», heta ličycca dvuma pajezdkami — i apłacić prajezd treba dvojčy.
U kamientarach pasažyry pryvodziać i inšyja prykłady. Adna z udzielnic abmierkavańnia raskazała, što ŭ aŭtobusie №127 ad Sierabranki da vakzała joj taksama davodzicca płacić dvojčy: pavodle jaje słoŭ, vakzał nie źjaŭlajecca kancavym prypynkam u adnym napramku, ale źjaŭlajecca pieršym prypynkam zvarotnaha maršrutu.
Inšyja rajać na čas ramontu karystacca prajaznym. U adkaz aŭtarka abmierkavańnia zaŭvažaje, što heta nie vyrašaje pytańnia: niezrazumieła, čamu z-za źmieny maršrutu pajezdku treba apłačvać dvojčy.
Svaim mierkavańniem z Onliner padzialiłasia jašče adna čytačka.
Pavodle jaje słoŭ, paśla pačatku budaŭnictva mietro žycharam bulvara Šaŭčenki stała składaniej dabiracca z boku Jakuba Kołasa. Ciapier tralejbusy №22 i №40 dazvalajuć dajechać tudy bieź pierasadki, choć i pa źmienienym maršrucie.
— Ctała zručna z boku Kołasa jechać — sieŭ na tralejbus №22 abo 40, prajechaŭ praz Kulmana, Kachoŭskuju, Šaŭčenku, vyjšaŭ dzie treba. Ale akazvajecca, pakolki na Kachoŭskaj kancavy prypynak, treba znoŭ apłačvać prajezd, choć ty ŭžo zapłaciŭ i tabie zastałosia prajechać jašče paru prypynkaŭ. Atrymlivajecca, byccam pramy transpart jość, choć i z abjezdam, ale płaciš dvojčy, choć jedzieš na adnym tralejbusie, — raspaviała dziaŭčyna.
U «Minsktransie» patłumačyli, što prajezd pa hetaj schiemie časovy — paśla zakančeńnia rabot tralejbusy znoŭ pavinny pajści pa bulvary Šaŭčenki ŭ abodvuch napramkach.