U Francyi pratestujuć školniki. Zatrymanyja bolš za 160 čałaviek
Pratesty ŭ francuzskich licejach pačalisia ŭ rehijonie Il-de-Frans vakoł Paryža, dzie byli zafiksavanyja vypadki vandalizmu i zapuski fiejervierkaŭ u bok palicyi.
Fota: Jean-Francois Badias / AP
Ź minułaha tydnia francuzskija padletki błakujuć škoły i pravodziać demanstracyi ŭ znak pratestu suprać cełaha šerahu prablem, u tym liku pierapoŭnienych kłasaŭ, vysokaj vučebnaj nahruzki i niedachopu nastaŭnikaŭ, piša Bi-bi-si.
Pratesty ŭ francuzskich licejach pačalisia ŭ rehijonie Il-de-Frans vakoł Paryža, dzie byli zafiksavanyja vypadki vandalizmu i zapuski fiejervierkaŭ u bok palicyi. U paniadziełak pratesty raspaŭsiudzilisia na inšyja rehijony: pavodle źviestak ahienctva AFP, čatyry licei byli zabłakavanyja ŭ paŭdniovych rehijonach Prymorskija Alpy i Var, a taksama paviedamlałasia pra pratesty ŭ Marseli, u rajonie Lila na poŭnačy krainy i ŭ Siedanie ŭ paŭnočna-ŭschodnim departamiencie Ardeny.
U paniadziełak premjer-ministr Francyi Siebaśćien Lekarniu zajaviŭ, što lubaja eskałacyja pratestaŭ u siarednich škołach — heta biezadkazna.
«Fiejervierki, pažary, hvałt kala licejaŭ: ništo nie apraŭdvaje stvareńnie pahrozy dla vučniaŭ, piersanału abo supracoŭnikaŭ palicyi», — napisaŭ Lekarniu ŭ X.
Jon rezka raskrytykavaŭ zakliki levaradykalnaj partyi «Niepakornaja Francyja» da pašyreńnia ruchu. «Hetaja eskałacyja biezadkaznaja», — zajaviŭ jon, dadaŭšy pry hetym, što «prablemy siarednich škoł pavinny być pačutyja i vyrašanyja».
U adkaz lidar partyi Žan-Luk Miełanšon abvinavaciŭ urad Lekorniu ŭ tym, što jon «addaŭ zahad ab padaŭleńni» pratestu, dadaŭšy, što staršakłaśniki, jakija ŭdzielničajuć u im, byli «biasškodnymi».
Ministr unutranych spraŭ Łaran Nuńjes zajaviŭ, što demanstracyi i błakady nielha ličyć typovymi pratesnymi ruchami.
«Heta značna bolš padobna da vuličnych biesparadkaŭ, u jakich udzielničali ludzi ŭ maskach, uzbrojenyja fiejervierkami ŭ trubkach i mietalnymi snaradami, jakija vidavočna imknulisia ŭstupić u kanfrantacyju ź siłami ŭnutranaj biaśpieki, — skazaŭ jon. — Havorka išła nie pra vyłučeńnie patrabavańniaŭ, a pra sapraŭdny hvałt u čystym vyhladzie».
Nuńjes paviedamiŭ žurnalistam, što ŭ paniadziełak było zatrymana 164 čałavieki i paciarpieli 180 škoł.
Jon paviedamiŭ, što ŭ paniadziełak paciarpieli 12 supracoŭnikaŭ siłavych struktur, 12 vučniaŭ i troje supracoŭnikaŭ škoł.
«My vidavočna majem spravu z haradskim hvałtam, jaki sprabuje advieści ŭbok toje, što pieršapačatkova było kłasičnym rucham staršakłaśnikaŭ, i ŭnieści hvałtoŭnaje parušeńnie ŭ praces školnaj demakratyi», — zajaviŭ u paniadziełak uviečary ministr adukacyi Eduard Žefre.