Uładalnik kuvałdy «Vahniera» z Rečycy atrymaŭ pracu śpiecyjalista pa moładzievaj palitycy

Havorka idzie pra zasnavalnika rečyckaha vajskova-patryjatyčnaha kłuba «Skif» Uładzimira Habrava, piša «Fłahštok».

Kadr z rolika Rečyckaha ŭpraŭleńnia technałahičnaha transpartu

U publikacyi Rečyckaha ŭpraŭleńnia technałahičnaha transpartu (RUTT), jaki ŭvachodzić u strukturu «Biełarusnafty», Habraŭ pakazany za pracoŭnym stałom siarod aficyjnych papier. U inšaj publikacyi paznačany jak śpiecyjalist słužby ideałahičnaj pracy, sacyjalnaj i moładzievaj palityki pradpryjemstva.

Jak vyśvietliŭ «Fłahštok», hetu pasadu Habraŭ zajmaje jak minimum hod — ź vieraśnia 2025 hoda. Pry hetym raniej zhadak pra takuju pasadu na pradpryjemstvie vyjaŭlena nie było. Tamu całkam vierahodna, što pasada była stvorana mienavita pad Habrava. Raniej struktury «Biełarusnafty» ŭžo padtrymlivali «patryjatyčnyja» inicyjatyvy kiraŭnika kłuba.

U 2024 hodzie Habraŭ pracavaŭ na vytvorčaj pasadzie — mašynistam technałahičnych nasosaŭ piataha razradu cecha padrychtoŭki i pierapracoŭki nafty ŭpraŭleńnia «Rečycanafta». Heta vynikaje ź jaho aficyjnaj bijahrafii kandydata ŭ deputaty.

Uładzimir Habraŭ šmat hadoŭ kiruje centram śpiecyjalnaj padrychtoŭki dapryzyŭnaj moładzi «Skif». Pierad pačatkam paŭnamaštabnaj vajny jon zaklikaŭ ukrainskich vajskoŭcaŭ zdavacca, a letam 2022 hoda rekłamavaŭ nabor u rasijskuju PVK «Vahnier».

Uładzimir Habraŭ z kuvałdaj «Vahniera». Kadr ź videa 2023 hoda. Krynica: instahram-staronka kłuba «Skif»

U 2023 hodzie Habraŭ atrymaŭ ad pradstaŭnika PVK «Vahnier» kuvałdu ź simvolikaj hrupoŭki i zrabiŭ jaje ekspanatam muzieja pry Rečyckaj rajonnaj himnazii (u 2022—2023 hadach kuvałda PVK stała simvałam pazasudovych raspraŭ na rasijskaj vajnie suprać Ukrainy). «Fłahštok» tady vyśvietliŭ, što čałaviekam, jaki padaryŭ kavałdu, vierahodna, byŭ kamandzir padraździaleńnia PVK Mikałaj Budźko. Jaho padazrajuć u dačynieńni da vajennych złačynstvaŭ. U lipieni 2025 hoda ŭznačaleny Habravym «Skif» apublikavaŭ niekrałoh u pamiać pra zahinułaha ŭ Afrycy rasijskaha najmita.

Ciapier ideałahičnaja praca i praca z moładździu ŭvachodziać u aficyjnyja słužbovyja abaviazki Habrava.

Kamientary da artykuła