Adzin ź piłotaŭ sprabavaŭ nakiravać samalot u ziamlu, druhi pieraškodziŭ hetamu. Dramatyčnyja padziei na borcie z Dubaja ŭ Tel-Aviŭ
abnoŭlena, dapoŭniena
Rejs FZ1073, jaki siońnia lacieŭ z Dubaja ŭ Tel-Aviŭ, raźviarnuŭsia padčas pralotu nad Ijardanijaj. Praź niekalki chvilin paśla aktyvacyi koda biedstva samalot znoŭ źmianiŭ kirunak. Źniščalniki VPS Izraila byli padniaty ŭ pavietra da samalota.
Incydent adbyŭsia ranicaj 30 vieraśnia na rejsie FZ1073 avijakampanii flydubai z Dubaja ŭ Tel-Aviŭ. Na borcie Boeing 737 MAX 8 znachodzilisia 174 pasažyry, pieravažna izrailcianie.
Ciapier ŚMI vyśviatlajuć, što tam adbyłosia.
Praz bojku ekipaž padaŭ kod, jaki vykarystoŭvajecca pry zachopie samalota, a Izrail padniaŭ u pavietra źniščalniki.
Źjaviłasia i inšaja viersija — adzin ź piłotaŭ moh sprabavać raźbić samalot. Izrailski 14‑y kanał śćviardžaje, što adzin ź piłotaŭ moh pasprabavać skončyć žyćcio samahubstvam i nakiravaŭ samalot u pikie, a druhi piłot spyniŭ jaho siłaj.
Pasažyr samalota raskazaŭ miedyjam, što adzin z členaŭ ekipaža nanios piłotu nažavoje ranieńnie i vyvieŭ sa stroju sistemy samalota. Pasažyry ŭvarvalisia ŭ kabinu piłotaŭ i abiasškodzili jaho.
«Pa ščaślivym źbiehu abstavin na borcie znachodzilisia jašče dva piłoty, jakija pasadzili samalot», — cytuje jaho telehram-kanał «Izrailskije trudovyjebudni».
«Heta było padobna da teraktu prosta padčas palotu. Nam zdavałasia, što my zaraz razabjomsia. Niekalki chvilin my dumali: albo razabjomsia, albo nas zarežuć», — raskazała inšaja pasažyrka.
Siońnia padčas palotu nad Ijardanijaj samalot na rejsie FZ1073 avijakampanii flydubai z Dubaja ŭ Tel-Aviŭ spačatku pieradaŭ ahulny avaryjny kod 7700, a zatym — kod 7500. Apošni aznačaje niezakonnaje ŭmiašańnie ŭ kiravańnie samalotam i zvyčajna vykarystoŭvajecca pry sprobie zachopu.
Bort rezka źniziŭsia prykładna da 15 tysiač futaŭ, raźviarnuŭsia i nakiravaŭsia ŭ Saudaŭskuju Araviju. Na niekatory čas suviaź z ekipažam źnikła.
Izrail padniaŭ u pavietra dva źniščalniki i časova prypyniŭ vylety z aeraporta Bien-Huryjon. Premjer-ministr Bińjamin Nietańjachu i kiraŭniki siłavych viedamstvaŭ praviali terminovuju naradu.
Samalot biaśpiečna pryziamliŭsia ŭ saudaŭskim aeraporcie. Avijakampanija paćvierdziła, što ŭsie pasažyry i členy ekipaža znachodziacca ŭ biaśpiecy. Za imi pavinien vylecieć inšy samalot, jaki dastavić ich u Izrail.
Aficyjna pryčyny zdareńnia nie ahučvalisia.