U amierykanskim Tenesi ŭpieršyniu za 200 hadoŭ źbiralisia pakarać śmierciu žančynu. Ale vykanańnie prypynili za hadzinu da pryznačanaha času

U amierykanskim štacie Tenesi vykanańnie śmiarotnaha prysudu Kryście Pajk było prypyniena krychu bolš čym za hadzinu da zapłanavanaha času. Kali prysud u vyniku budzie vykanany, jana stanie pieršaj žančynaj, pakaranaj śmierciu ŭ Tenesi bolš čym za 200 hadoŭ, piša Bi-bi-si.

Fota: Tennessee Department of Corrections

50‑hadovaja Pajk znachodzicca ŭ kamiery śmiarotnikaŭ z 1996 hoda. Jaje pryznali vinavataj u zabojstvie 19‑hadovaj Kolin Ślemier, ździejśnienym u 1995 hodzie. Na momant złačynstva Pajk było 18 hadoŭ. Jana razam sa svaim tahačasnym chłopcam Tadarylem Šypam źbivała i katavała Ślemier, ź jakoj jany paznajomilisia ŭ łahiery prafiesijnaj padrychtoŭki dla padletkaŭ z prablemami ŭ pavodzinach.

30 vieraśnia sudździ Šostaha akruhovaha apielacyjnaha suda ZŠA zajavili, što im patrebny dadatkovy čas dla razhladu arhumientaŭ abarony. Praciahłaść adterminoŭki pakul nieviadomaja.

Rašeńnie było pryniata paśla taho, jak raniej na hetym tydni Viarchoŭny sud ZŠA admoviŭsia razhladać prośbu ab adterminoŭcy, a hubiernatar Tenesi nie zadavoliŭ chadajnictva Pajk ab pamiłavańni.

Advakaty Pajk zajavili, što na praciahu mnohich hadoŭ u sudach ułady Tenesi śćviardžali, što jana chłusiła pra seksualny hvałt, jakomu padviarhałasia ŭ dziacinstvie. Adnak padčas niadaŭniaha razhladu spravy, źviazanaj sa sposabam vykanańnia śmiarotnaha prysudu, štat užo nie asprečvaŭ fakt taho, što Pajk pieražyła seksualny hvałt i zhvałtavańnie.

Abarona paprasiła apielacyjny sud viarnuć jaje chadajnictva ŭ akruhovy sud. Pa słovach advakataŭ, kali fiederalnyja sudy raniej prymali rašeńni, hruntujučysia na zajavie štata pra toje, što Pajk chłusiła, heta mahło paŭpłyvać na razhlad jaje spravy na fiederalnym uzroŭni.

Asobnaja apielacyja, jakaja pryviała da ciapierašniaha prypynieńnia prysudu, tyčycca sposabu pakarańnia śmierciu z dapamohaj śmiarotnaj injekcyi. Advakaty śćviardžajuć, što takaja pracedura moža vyklikać bolšyja pakuty, čym nieabchodna dla vykanańnia prysudu, što, na ich dumku, supiarečyć Kanstytucyi ZŠA. Jany taksama zajavili, što pracedury štata nie dali Pajk spraviadlivaj mahčymaści dakazać heta ŭ sudzie.

Hienieralny prakuror Tenesi zajaviŭ, što štat budzie praciahvać damahacca vykanańnia pryznačanaha pakarańnia i paprosić Viarchoŭny sud ZŠA admianić rašeńnie ab prypynieńni. Jon adznačyŭ, što ŭ spravach ab śmiarotnym pakarańni abarona niaredka padaje piarečańni na poźnim etapie paśla šmathadovych sudovych pracesaŭ.

Zabojstva Kolin Ślemier atrymała vialiki rezanans u Nokśvile ŭ 1995 hodzie. Cieła 19‑hadovaj dziaŭčyny znajšli z vyrazanaj na hrudziach pientahramaj. Pajk admaŭlała, što sama vyrazała hety znak. Pavodle pakazańniaŭ dvuch inšych vychavancaŭ łahiera, jana raskazvała pra zabojstva da i paśla jaho ździajśnieńnia i pakazvała im frahmient čerapa Ślemier.

Kolin Ślemier było 19 hadoŭ, kali jaje zabili ŭ 1995 hodzie. Fota: Family Handout

Praz hod paśla zabojstva Pajk prysudzili da śmiarotnaha pakarańnia. Šyp, jakomu na toj momant było 17 hadoŭ, atrymaŭ pažyćciovaje źniavoleńnie z mahčymaściu ŭmoŭna-daterminovaha vyzvaleńnia.

U Pajk była dakumientalna zafiksavanaja historyja seksualnaha hvałtu ŭ dziacinstvie, a taksama bieznahladnaści. Jaje advakaty śćviardžajuć, što kali b jaje sudzili siońnia za takoje ž złačynstva, ździejśnienaje ŭ padletkavym uzroście, jana nie atrymała b śmiarotnaha prysudu.

U 2025 hodzie Viarchoŭny sud Tenesi pastanaviŭ, što Pajk nie pradstaviła abstavin, jakija mahli b stać padstavaj dla źmiakčeńnia pakarańnia. Pavodle Departamienta vykanańnia pakarańniaŭ Tenesi, na momant zaklučeńnia pad vartu Pajk była samym maładym čałaviekam u kamiery śmiarotnikaŭ.

Kamientary da artykuła