«Ja paciahnuŭ za šturvał». Pasažyr rejsa Flydubai raspavioŭ, jak jamu ŭdałosia vyratavać samalot Dubaj — Tel-Aviŭ

Inšyja ludzi, jakija znachodzilisia na borcie, apisali žachlivyja siekundy, kali jany ŭžo rychtavalisia da śmierci.

Fota: Jamal Awad/picture alliance via Getty Images

Izrailski pasažyr samalota, jaki lacieŭ z Dubaja ŭ Tel-Aviŭ, raspavioŭ, jak jamu ŭdałosia skrucić druhoha piłota paśla taho, jak toj udaryŭ nažom kamandzira ekipaža i, vierahodna, pasprabavaŭ nakiravać Boeing 737 Max 8 u ziamlu. Inšyja ludzi, jakija znachodzilisia na borcie, apisali «žachlivyja» siekundy, kali jany ŭžo rychtavalisia da śmierci, piša Bi-bi-si.

Pasažyr rejsa FZ1073 avijakampanii Flydubai Janiŭ Chajun sustreŭ premjer-ministra Izraila Bińjamina Nietańjachu paśla pryziamleńnia reziervovaha borta ŭ Tel-Avivie. Jon usio jašče byŭ u zakryvaŭlenaj futbołcy.

Ułady Izraila ličać, što toje, što adbyłosia, było sprobaj džychadzistaŭ ździejśnić napad. Rasśledavańnie incydentu praciahvajecca, aficyjnych zajaŭ ab matyvach padazravanaha pakul nie było.

Adnak Flydubai abviaściła, što na čas rasśledavańnia prypyniaje paloty ŭ Tel-Aviŭ.

Paśla taho jak Chajun abiasškodziŭ napadnika, samalot udałosia stabilizavać, a ekstranuju pasadku ŭ horadzie Tabuk na paŭnočnym zachadzie Saudaŭskaj Aravii ździejśnili dva inšyja piłoty, jakija znachodzilisia na borcie ŭ jakaści pasažyraŭ.

«U kresłach piłotaŭ nikoha nie było»

Chajun skazaŭ premjer-ministru, što zapadozryŭ niešta niadobraje, kali samalot raptam pačaŭ stračvać vyšyniu i mienš čym za dźvie chviliny źniziŭsia na 5,2 tysiačy mietraŭ.

«Chtości pačaŭ kryčać, zhasła śviatło», — kaža Janiŭ Chajun na videazapisie, jaki apublikavaŭ premjer-ministr Izraila.

Paśla hetaha jon razam ź inšymi pasažyrami pasprabavaŭ adčynić dźviery kabiny piłotaŭ, ale heta było niaprostaj zadačaj.

«Piłot, jakoha paranili nažom, prosta znachodziŭsia vielmi blizka da dźviarej, tamu nam było ciažka ich adkryć», — skazaŭ Chajun.

Ale, pavodle jaho słoŭ, paranieny piłot pierad tym, jak stracić prytomnaść, zdoleŭ adkryć dźviery.

«Kali ja ŭvajšoŭ, ja ŭbačyŭ napadnika kala prybornaj paneli, pamiž dvuma kresłami… u kresłach piłotaŭ nikoha nie było. Adzin lažaŭ na padłozie, druhi byŭ kala prybornaj paneli. Jašče adzin chłopiec uvajšoŭ [u kabinu] razam sa mnoj. Ja schapiŭ napadnika, uziaŭ jaho ŭ zadušlivy zachop i vyciahnuŭ — najpierš — vonki».

Pavodle jaho słoŭ, napadnik «sprabavaŭ raźbić prybory, kab vyvieści samalot sa stroju».

Janiŭ raspavioŭ, što paklikaŭ izrailcian, jakija byli ŭ samalocie, i razam jany «prycisnuli napadnika da padłohi, kab jon nie moh supraciŭlacca».

Janiŭ taksama rastłumačyŭ, što paciahnuŭ za šturvał [samalota].

«Vy paciahnuli za šturvał?» — pierapytaŭ Nietańjachu.

«Ja hladžu pieradaču «Rasśledavańni avijakatastrof», spadar premjer-ministr, — adkazaŭ Janiŭ. — Samalot pačaŭ vyraŭnoŭvacca, a potym piłot [vierahodna, havorka idzie pra adnaho ź piłotaŭ, jakija lacieli ŭ samalocie ŭ jakaści pasažyraŭ, — Bi-bi-si] skazaŭ mnie, što dalej voźmie kiravańnie na siabie».

Janiŭ raspaviadaje Nietańjachu pra historyju vyratavańnia 

Nietańjachu nazvaŭ Chajuna «hierojem» i spytaŭ, jak jamu heta ŭdałosia.

«My ž narod lvoŭ, ci nie tak?» — adkazaŭ pasažyr.

Nietańjachu skazaŭ, što bačyć pierad saboj «vialikaha hieroja», i, pakazvajučy na kryvavuju plamu na futbołcy, spytaŭ: «Oho, heta ad jaho?»

Pasažyr adkazaŭ: «Tak, heta ad jaho».

«Toje, što vy zrabili, prosta nievierahodna», — skazaŭ Nietańjachu.

«Takoje adčuvańnie, što prajšoŭ praź piekła»

Jašče adzin pasažyr, Ćvika Mienes, raspavioŭ izrailskamu hramadskamu viaščalniku Kan, što dapamoh skrucić napadnika, a inšyja «dapamahli źviazać jaho z dapamohaj jaho ŭłasnych płastykavych ściažak i šnuroŭ ad navušnikaŭ».

«Druhi piłot, jaki znachodziŭsia ŭ pasažyrskim sałonie, zamianiŭ druhoha piłota [ŭ kabinie], tak što jany i pasadzili samalot», — dadaŭ hety čałaviek.

Paźniej pasažyraŭ rejsa Flydubai dastavili ŭ Tel-Aviŭ na reziervovym samalocie. U aeraporcie «Ben-Huryjon» ich sustreła mnostva ludziej ź izrailskimi ściahami, jakija vitali ich muzykaj, tancami i pieśniami.

«Słava Bohu, ja žyvy, — skazaŭ žurnalistam adzin z pasažyraŭ, Chaim Łazarovič. — Samym žachlivym padčas hetaha palotu było toje, kali piłot straciŭ kantrol».

18‑hadovy pasažyr Oran Koen apisaŭ pieražytaje jak «vielmi ciažki momant».

«Mahčyma, prajšło ŭsiaho piać chvilin, ale takoje adčuvańnie, što ja prajšoŭ praź piekła. Ja čuŭ, jak moj brat, jaki siadzieŭ za mnoj, pačaŭ kryčać, što my ŭsie zahiniem», — dadaŭ jon.

Supracoŭnik izrailskaj słužby chutkaj dapamohi paźniej skazaŭ Bi-bi-si, što niekalki čałaviek, jakija znachodzilisia na borcie, «byli vielmi ŭschvalavanyja i płakali, kali vychodzili z samalota».

Kamandzir ekipaža, hramadzianin Indyi Śmit Mačchar, jaki atrymaŭ nažavyja ranieńni, byŭ dastaŭleny ŭ balnicu, ale znachodzicca ŭ stabilnym stanie, paviedamiła pasolstva Indyi ŭ Saudaŭskaj Aravii.

Napadnik aryštavany, jaho dapytvajuć saudaŭskija ŭłady.

Kamientary da artykuła