U polskaj vajskovaj žandarmieryi adkryli tajamničy kanviert: troje trapili ŭ balnicu, 133 čałavieki evakujavali
Dvoje vajskoŭcaŭ i cyvilny supracoŭnik adčuli razdražnieńnie skury paśla adkryćcia kanvierta, dasłanaha z Hiermanii.
Zdareńnie adbyłosia ŭ adździaleńni Vajskovaj žandarmieryi ŭ horadzie Nova-Demba na paŭdniovym uschodzie Polščy, piša «Rzeczpospolita» sa spasyłkaj na RMF FM.
U kanviercie znachodziłasia paštoŭka. Paśla jaje razhortvańnia nijakaha parašku abo inšaha rečyva nie zaŭvažyli, adnak nieŭzabavie dvoje vajskoŭcaŭ i cyvilny supracoŭnik adčuli razdražnieńnie skury tvaru i ruk. Ich dastavili ŭ balnicu.
Jašče čatyroch vajskoŭcaŭ, jakija mahli kantaktavać z pasyłkaj, izalavali. Simptomaŭ u ich nie było.
Z susiedniaj častki budynka ŭ metach biaśpieki evakujavali 133 čałavieki.
«Ahlad pasyłki vyklučyŭ najaŭnaść chimičnych, bijałahičnych i radyjeaktyŭnych rečyvaŭ», — paviedamiła Vajskovaja žandarmieryja.
Paśla abśledavańnia troch paciarpiełych vypisali z balnicy. Pavodle pradstaŭnika žandarmieryi, analizy nie vyjavili prykmiet atručeńnia.
Što mienavita vyklikała razdražnieńnie skury, pakul nieviadoma. Abstaviny zdareńnia vyśviatlajuć.