Skandał na fotakonkursie mikravyjavaŭ Nikon: pieramožcu zapadozryli ŭ vykarystańni štučnaha intelektu
Pracu-pieramožcu prestyžnaha konkursu navukovaj fatahrafii vyrašyli paŭtorna pravieryć paśla taho, jak navukoŭcy zapadozryli, što pry jaje stvareńni vykarystoŭvaŭsia štučny intelekt, piša Bi-bi-si.
Štohadovy konkurs Nikon Small World In Motion pravodzicca ŭžo 15 hadoŭ i prymaje fatahrafii i videazapisy, zroblenyja z dapamohaj mahutnych mikraskopaŭ.
Sioleta pieramožcam staŭ karotki videarolik, pradstaŭleny doktaram Ninam Siuj, daśledčykam z Univiersiteta Cynchua ŭ Kitai. Aŭtar śćviardžaje, što na videa zafiksavany ruch malusieńkich vałasapadobnych struktur — viejek — u dychalnych šlachach dziciaci, jakoje pakutuje na redkaje zachvorvańnie.
Siuj nie adkazaŭ na prośbu Bi-bi-si prakamientavać situacyju, adnak apublikavaŭ u internecie zajavu, u jakoj admaŭlaje, što parušyŭ praviły konkursu. U adkaz na publikacyju Nikon u LinkedIn Siuj nie staŭ admaŭlać, što vykarystoŭvaŭ štučny intelekt pry apracoŭcy vyjavy, adnak zajaviŭ, što nie parušyŭ praviłaŭ konkursu.
«ŠI nie vykarystoŭvaŭsia dla stvareńnia ekśpierymientalnaha videa, samich viejčykaŭ abo ich ruchu», — napisaŭ jon.
Videa Siuja afarbavana ŭ štučna jarkija kolery — heta zvyčajnaja praktyka ŭ mikraskapii, dazvolenaja praviłami konkursu. Jak praviła, dla hetaha ilustracyju ŭručnuju afarboŭvajuć admysłovymi farbavalnikami.
Siuj pryznaŭ, što ŠI vykarystoŭvaŭsia «dla vyłučeńnia i vizualizacyi asablivaściaŭ rekanstrujavanych vyjaŭ u adcieńniach šeraha».
Adnak inšyja navukoŭcy źviarnuli ŭvahu na šerah detalaŭ, jakija, na ich dumku, staviać pad sumnieŭ sapraŭdnaść videa.
Jany śćviardžajuć, što niekatoryja formy i ruchi nie adpaviadajuć zvyčajnaj budovie i pavodzinam kletak, a sami viejčyki vyhladajuć zanadta bujnymi.
Dacent Univiersiteta Fłarydy Edvard Fiełps, kamientujučy publikacyju Nikon u sacyjalnych sietkach, adznačyŭ, što niekatoryja struktury na videa «ŭźnikajuć i źnikajuć», a viejčyki «źjaŭlajucca ź niadkul».
Aśpirant Paŭdniova-Zachodniaha miedycynskaha centra Techaskaha ŭniviersiteta Ien Donavan, u svaju čarhu, zajaviŭ, što na zychodnaj vyjavie, vidać, prysutničaje charakterny vadziany znak, jaki pakazvaje na vykarystańnie hienieratyŭnaha ŠI.
Sumnievy ŭ sapraŭdnaści raboty taksama vykazali dvoje byłych členaŭ žury konkursu. U Nikon zajavili, što Siuj «u poŭnaj miery supracoŭničaje» z pravierkaj, jakaja pravodzicca, i ŭžo pradastaviŭ kampanii dadatkovyja techničnyja dakumienty.
Doktar Patryk Chiki, jaki zaniaŭ piataje miesca ŭ konkursie Small World 2026 hoda, kaža, što pryznańnie, jakoje daje ŭdzieł u takim konkursie, značna važniejšaje za hrašovy pryz u pamiery $3 tysiač.
«Kali vy pravodzicie bolšuju častku času ŭ ciomnym pakoi, hledziačy ŭ mikraskop, vielmi pryjemna atrymać mahčymaść pakazać svaju rabotu inšym ludziam, šyrokaj publicy, — skazaŭ jon. — Tut cikava spałučajucca navuka i mastactva: mnohija vyjavy, jakija stvarajuć navukoŭcy, vałodajuć davoli abstraktnymi i mastackimi jakaściami».
Pavodle słoŭ Chiki, kali vyśvietlicca, što videa-pieramožca było niedapuščalnym čynam źmieniena z dapamohaj ŠI, heta budzie niespraviadliva ŭ dačynieńni da inšych udzielnikaŭ.
«Konkurs maje vyrazny nabor praviłaŭ. Adno ź ich niepasredna kaža, što nielha vykarystoŭvać hienieratyŭny ŠI dla stvareńnia vyjaŭ. Inšaje vidavočnaje patrabavańnie — materyjał pavinien być źniaty z dapamohaj mikraskopa», — skazaŭ jon.
Pakul Nikon ličyć, što ŭstanoŭlenyja pracedury byli vykananyja, adnak abiacaje ŭ bližejšy čas paviedamić pra vyniki pravierki.
«Na hety momant my nie bačym prykmiet taho, što jakija-niebudź praviły byli parušanyja», — havorycca ŭ zajavie kampanii.