Biełarus pad Minskam na čatyroch sotkach vyraściŭ tonu batatu
Batat, jaki ŭ Biełarusi ličycca ekzotykaj, moža stać nie horšym za bulbu. Žychar Aronavaj Słabady Viktar nie prosta vyraściŭ paŭdniovy karniapłod, ale i vyvieŭ ułasnyja sarty, prystasavanyja da miascovaha klimatu, piša pristalica.by.
Vyroščvańnie batatu ŭ biełaruskich umovach — praces zachaplalny, ale patrabuje viedaŭ. Pavodle słoŭ Viktara, hety hod vydaŭsia składaniejšym za papiaredni z-za kapryzaŭ nadvorja.
— Batat — niepradkazalnaja raślina ŭ biełaruskich šyrotach. U našych umovach jon moža dać jak supieruradžaj, tak i minimalny ŭradžaj — usio zaležyć ad taho, jakija sarty my budziem vykarystoŭvać, — tłumačyć mužčyna.
— Nadvorje sioleta padviało: ciapło źmianiałasia daždžami, a potym śpiakotaj. Kali letaś kłubni vyrastali da dvuch kiłahramaŭ, to sioleta stabilna atrymlivajem pa kiłahramie-paŭtara.
Tym nie mienš, pravilny padychod daje vynik. Samaje hałoŭnaje — svoječasova padrychtavać hradki, zrabić ich suchimi i rychłymi, a zatym nakryć polietylenam. Pavodle słoŭ žychara Aronavaj Słabady, pieraŭvilhotnienaja ziamla zhubnaja dla hetaj kultury, a voś lohkija supiasčanyja i tarfianyja hleby padychodziać idealna.
Čamu atrymać nasieńnie batatu ŭ Biełarusi najskładaniej
Kalekcyi Viktara moža pazajzdrościć luby ahranom: aficyjna pryznanych i vyprabavanych sartoŭ u jaho naličvałasia kala 54. Adzin ź ich daviałosia vybrakavać, bo jamu nie spadabałasia miascovaja prachałoda.
Asobny napramak pracy haspadara — sielekcyja. Atrymać nasieńnie batatu ŭ biełaruskim klimacie — nadzvyčaj składanaja zadača, jakaja patrabuje stabilnaha ciapła i pracy nasiakomych-apylalnikaŭ. U daždžlivaje leta z hetym było niaprosta. Tym nie mienš, entuzijast paśpiachova praroščvaje nasieńnie ŭ kubkach Pietry i vypraboŭvaje novyja ekśpierymientalnyja ŭzory.
— Pieršyja biełaruskija sarty źjavilisia letaś, a sioleta jany prajšli druhi etap pracy i pakazali siabie ź lepšaha boku. Tamu niekatoryja ź ich užo atrymajuć svaje nazvy, — dzielicca pośpiechami sielekcyjanier.
Dyjabietykam i ludziam z sardečna-sasudzistymi zachvorvańniami: čym batat adroźnivajecca ad zvyčajnaj bulby
Akramia niezvyčajnaha smaku i raznastajnaści kulinarnaha vykarystańnia, z batatu hatujuć supy, zapiakanki, musy, čyzkiejki i navat karysnyja bułački. Kultura cenicca za svaje ŭłaścivaści.
— Batat dobry tym, što jon całkam zasvojvajecca, u adroźnieńnie ad zvyčajnaj bulby, u jakoj vysoki ŭzrovień cukru. U batatu vielmi nizki hlikiemičny indeks, tamu jon karysny dla dyjabietykaŭ i ludziej z sardečna-sasudzistymi zachvorvańniami, — tłumačyć Viktar.
Niachaj batat i paŭdniovaja kultura, pad Minskam jon užo pryžyŭsia — i, zdajecca, usurjoz. Tak što «druhi chleb» pakul trymajecca, ale kankurent u jaho ŭžo jość.