Čornyja paŭzučyja istoty atakujuć šmatkvaternyja damy ŭ Maładziečnie
Žychary aścierahajucca, što vielmi chutka hetyja niaprošanyja hości mohuć apynucca ŭ ich kvaterach.
Žychary dvuch šmatkvaternych damoŭ na vulicy Kryničnaj zaniepakojenyja našeściem čornych istot, padobnych da čarviakoŭ, jakija kala padjezdaŭ i padvałaŭ źbirajucca ŭ kučki i zapaŭzajuć na ścieny fasadaŭ. Žychary aścierahajucca, što vielmi chutka hetyja niaprošanyja hości mohuć apynucca ŭ ich kvaterach, piša Kraj.by.
Dzieviacipaviarchovy dom №11 i piacipaviarchovik №5 na vulicy Kryničnaj abjadnoŭvaje adzin ahulny fakt — u ich niadaŭna praviali kapitalny ramont. Damy znachodziacca praktyčna adzin nasuprać adnaho.
Źjaŭleńnie paŭzučych istot u suviazi z kapitalnym ramontam — hałoŭnaja viersija žycharoŭ
Ciapier, vosieńniu, žychary doma №11 užo amal paŭhoda žyvuć u svaim adramantavanym dzieviacipaviarchoviku. Kapitalny ramont piacipaviarchovaha doma № 5 padychodzić da kanca.
Čornyja istoty źjavilisia kala abodvuch damoŭ. Zhadać pra čas zaviaršeńnia kapitalnych ramontaŭ važna, bo žychary ź vialikaj vierahodnaściu ličać, što źjaŭleńnie paŭzučych istot niepasredna źviazana z kapitalnymi ramontami.
— Prykładna tydzień tamu my zaŭvažyli kala ŭvachodu ŭ padvał našaha pieršaha padjezda niejkija čornyja kropki, — raskazvaje žycharka doma №5 Darja Vasileŭna.
— Spačatku nie nadali hetamu značeńnia. Dumali, što, moža, heta kavałački torfu ci jašče niešta, bo kapitalny ramont padychodzić da kanca. Ale akazałasia, što heta istoty, padobnyja da čarviakoŭ. Z kožnym dniom ich stanovicca ŭsio bolš.
— Učora ja telefanavała ŭ naša domakiraŭnictva i ŭ sanstancyju. Mnie skazali, što hetyja čarviaki — biaskryŭdnyja. A ŭ epidemijałahičnym adździele sanstancyi kažuć: «Takija čarviaki i ŭ nas jość». Tam taksama niadaŭna byŭ ramont. Biaskryŭdnyja jany ci nie, my nie viedajem, ale nam usio roŭna strašna, tamu što kala adzinaccataha doma ich užo vielmi šmat. Značyć, toje samaje čakaje i nas.
Nina Arkadzieŭna kala svajho čaćviortaha padjezda vyrašyła samastojna zmahacca ź niaprošanymi haściami. Jana ŭziała i zaliła navały istot dychłafosam. Paśla pracedury atručvańnia ich stała prykmietna mienš. A ŭ tych, što zastalisia, pavodle słoŭ Niny Arkadzieŭny, vidavočna pamienšyłasia žvavaść.
— U domakiraŭnictvie kažuć: «Ničoha strašnaha. U čarviakoŭ projdzie inkubacyjny pieryjad, i jany raspaŭzucca», — pieradajuć žychary piacipaviarchovika staŭleńnie kamunalnikaŭ da hetaj prablemy.
— A my atrymlivali kvatery ŭ hetym domie ŭ 1993 hodzie paśla jaho pabudovy. I ŭsie hetyja hady ŭ nas nie było nijakich čarviakoŭ, pakul nam nie zrabili kapitalny ramont.
«Dvornik skazaŭ, što nichto jaho nie prymusić prybirać čarviakoŭ»
Kapitalny ramont u domie №11 skončyli viasnoj hetaha hoda, a zasialili jaho ŭ 1994 hodzie. Paŭzučych haściej tut upieršyniu zaŭvažyli paśla zakančeńnia pieršaj dekady vieraśnia biahučaha hoda, heta značyć amal praz paŭhoda paśla kapitalnaha ramontu.
Miascovaja žycharka Ludmiła raskazvaje, što skardziłasia dvorniku na čarviakoŭ i atrymała ad jaho adkaz:
— Nichto mianie nie prymusić ich prybirać.
Zoja Leanidaŭna z mužam žyvie na pieršym paviersie. 1 vieraśnia muž i žonka źjechali ŭ sanatoryj. Čarviakoŭ pobač z domam tady nie było. Viarnulisia dadomu 17 vieraśnia — ich užo cełyja kučki.
— U paniadziełak ja patelefanavała ŭ słužbu 115. Mnie skazali, što zajaŭku pryniali, navat numar joj prysvojeny. I abiacali patelefanavać, kali prablema budzie vyrašana. Siońnia čaćvier, ale nijakich źmienaŭ u nas niama. I nichto nam nie telefanavaŭ, — skazała Zoja Leanidaŭna.
Zajaŭku ŭ słužbie 115 pryniali, potym zakryli, ale istot nichto nie kranuŭ
Susiedka Zoi Leanidaŭny pa pieršym paviersie — jašče adna Ludmiła. Joj tryvožna nie tolki tamu, što kvatera na pieršym paviersie, ale i tamu, što jana haduje traich dziaciej. Šmatdzietnaja maci raskazvaje, što 11 vieraśnia nakiravała svaju zajaŭku ŭ słužbu 115. 18 vieraśnia Ludmiła atrymała adkaz: zajaŭka zakrytaja, pakolki pieradadzienaja ŭ Maładziečanski zanalny centr hihijeny i epidemijałohii dla dezynsiekcyi, heta značyć dla praviadzieńnia kompleksu mierapryjemstvaŭ, nakiravanych na źniščeńnie nasiakomych i inšych členistanohich, jakija mohuć pieranosić infiekcyi i škodzić zdaroŭju čałavieka.
Žurnalist paprasiŭ Ludmiłu prama na miescy pravieści ekśpierymient: sfatahrafavać čarviakoŭ i zrabić zapyt u internecie pa hetaj fatahrafii. Maładaja žančyna ŭstanaviła, što istoty, jakija teraryzujuć dva damy na Kryničnaj, padobnyja da šmatnožki kiŭsiaka.
Kiŭsiaki žyvuć kala pavierchni hleby, a taksama ŭ bolš hłybokich jaje płastach. Časta ich možna znajści ŭ lesie pad letašnim liściem, pad kamianiami, doškami i roznymi inšymi pradmietami. Hetyja šmatnožki charčujucca apałym liściem, pierahniłymi harodninaj i sadavinaj. Časam mohuć škodzić raślinam, paškodžvajučy karniapłody i płady.
U horadzie kiŭsiaki źjaŭlajucca ŭ pošukach schovišča — ratujucca ad zasuchi abo zatapleńnia vadoj padčas praciahłych daždžoŭ. A taksama ŭ vyniku mihracyi — pierapaŭzajuć z hazonaŭ, pustak abo parkaŭ da śviatła albo ŭ bok čałaviečaha žylla.
Što tyčycca horada, to rekamiendujecca prybrać navały apałaha liścia, doški i śmiećcie kala ścien damoŭ, załadzić ščyliny ŭ padmurku i parohach, ustalavać drobnyja sietki na vientylacyju.
Pry hetym chimičnyja preparaty, pryznačanyja dla źniščeńnia nasiakomych-škodnikaŭ, u baraćbie z kiŭsiakom nieefiektyŭnyja z-za jaho ščylnaha chicinavaha pancyra.