Tvaru bresckaha DFR tak i nie dali pałkoŭnika. I adpravili ideołaham u kacielniu
Valeryj Vielaśnicki bolš za 15 hadoŭ byŭ hołasam finansavaj milicyi Bieraściejščyny.
Valeryj Vielaśnicki. Skrynšot: ANT
U 2010‑ch padpałkoŭnik Valeryj Vielaśnicki kiravaŭ Pinskim mižrajonnym adździełam upraŭleńnia Departamienta finansavych rasśledavańniaŭ Dziaržkantrolu pa Bresckaj vobłaści i adkazvaŭ za Pinsk, Pinski, Łuniniecki, Ivanaŭski i Stolinskija rajony.
Pry im, da jubileju adździeła, pa błahasłavieńni archijepiskapa Pinskaha i Łuninieckaha Stefana, zrabili charuhvy sa śviatym apostałam Paŭłam — «niabiesnym zastupnikam orhanaŭ finansavych rasśledavańniaŭ».
Uletku 2020 hoda Vielaśnickaha pieraviali ŭ abłasnoje ŭpraŭleńnie DFR, dzie jon faktyčna staŭ tvaram upraŭleńnia, kamientujučy ŭsie hučnyja spravy vobłaści.
U 2020 DFR staŭ instrumientam ažyćciaŭleńnia palityčnych represij, kali pad vyhladam pryciahnieńnia da adkaznaści za finansavyja parušeńni represiŭnyja orhany karali hramadzian za prajaŭleńnie hramadzianskaj pazicyi. Asabistaja rola Vielaśnickaha ŭ represijach, a taksama dola sfabrykavanych spravaŭ pakul što nieviadomaja.
Apošni viadomy kamientar Vielaśnickaha jak supracoŭnika Departamienta finansavych rasśledavańniaŭ vyjšaŭ u 2025 hodzie.
A ŭžo ŭ 2026, jak stała viadoma «Našaj Nivie», Vielaśnicki ŭspłyŭ jak ideołah Bresckaj kacielnaj haspadarki. Na pradpryjemstvie pracuje kala 450 čałaviek.
Valer Vielaśnicki viadzie ideałahičny sieminar na novym miescy pracy. Fota: t.me/KUPPBKH
Ciapier jahonaja praca — «adzinyja dni infarmavańnia», sieminary «ideałahičnaj viertykali» Leninskaha rajona i realizacyja dyrektyvy №12 «Ab realizacyi asnoŭ ideałohii biełaruskaj dziaržavy». Hetym, ułasna, i zapoŭnieny telehram-kanał Bresckaj kacielnaj haspadarki.
Što cikava, za doŭhuju karjeru ŭ orhanach Vielaśnickamu tak i nie dali pałkoŭnika. Zhodna z Pałažeńniem ab prachodžańni słužby ŭ orhanach finansavych rasśledavańniaŭ, padpałkoŭniki (i nižej) mohuć słužyć da 48 hadoŭ. Hety ŭzrost u Vielaśnickaha nastupiŭ 5 krasavika 2026 hoda. Dalej — tolki z asabistaj zhody kiraŭnictva abo pry prysvajeńni zvańnia pałkoŭnika.