Hieraičny indyjski piłot Flydubai upieršyniu raskazaŭ, što adbyvałasia ŭ kabinie samalota na rejsie z Dubaja ŭ Tel-Aviŭ

Indyjski piłot Śmit Mačchar, jaki atrymaŭ ciažkija ranieńni padčas sproby zachopu samalota Flydubai, upieršyniu paśla incydentu raskazaŭ pra toje, što adbyvałasia ŭ kabinie piłotaŭ. Jon zrabiŭ heta padčas videarazmovy z premjer-ministram Indyi Narendram Modzi, piša Bi-bi-si.

Śmit Mačchar i Narendra Modzi. Fota: pres-słužba ŭrada Indyi

Pa słovach Mačchara, jon lažaŭ na padłozie, byŭ paranieny, a druhi piłot praciahvaŭ na jaho napadać. Pry hetym kapitan razumieŭ, što samalot chutka tracić vyšyniu i treba niešta rabić.

«Ja lažaŭ na padłozie paranieny, ale skazaŭ sabie, što pavinien zrabić apošniaje namahańnie i adčynić dźviery znutry, kab inšyja ludzi mahli ŭvajści ŭ kabinu i taksama dapamahčy ŭziać situacyju pad kantrol. Viadoma, ja zmahaŭsia za ŭłasnaje žyćcio, ale adnačasova razumieŭ, što nie dazvolu zahinuć inšym», — raskazaŭ piłot.

Pasažyry, jakija ŭvajšli ŭ kabinu, kab abiasškodzić napadnika, ubačyli Mačchara na padłozie ŭ łužynie kryvi. Paźniej izrailski doktar, jaki akazvaŭ jamu pieršuju dapamohu na borcie, paćvierdziŭ, što piłot straciŭ šmat kryvi.

Pasažyry i premjer-ministr Izraila Bińjamin Nietańjachu nazvali jaho sprobu daciahnucca da knopki razbłakavańnia dźviarej u takim stanie hieraičnym učynkam. Narendra Modzi zajaviŭ kapitanu, što jaho mužnaść, vytrymka i zdolnaść chutka prymać rašeńni dapamahli vyratavać žyćci mnohich ludziej.

Pasolstva Indyi ŭ AAE paviedamiła, što Mačchar adčuvaje siabie dobra i paśpiachova adnaŭlajecca. Sam piłot skazaŭ, što starajecca nie ŭsprymać svajo ranieńnie mienavita jak ranieńnie, bo heta ŭskładniła b adnaŭleńnie. Jon nazvaŭ reabilitacyju šlacham, jaki patrabuje času, ale zajaviŭ, što ŭpeŭnieny ŭ svaim vyzdaraŭleńni.

Incydent na borcie rejsa Dubaj — Tel-Aviŭ adbyŭsia 30 vieraśnia Prykładna praź dźvie hadziny paśla pačatku palotu samalot rezka straciŭ bolš za 17 tysiač futaŭ, abo kala 5,2 kiłamietra, vyšyni.

Adna z pasažyrak, jakaja išła z maleńkaj dačkoj u tualet, pačuła šum u kabinie piłota i źviarnuła na heta ŭvahu inšych pasažyraŭ i členaŭ ekipaža. Nieŭzabavie stała zrazumieła, što ŭ kabinie adbyvajecca baraćba.

Pasažyry sprabavali trapić u kabinu, ale zrabić heta spačatku nie ŭdałosia. Paśla teraktaŭ 11 vieraśnia 2001 hoda pracedura dostupu ŭ kabinu była źmienienaja takim čynam, što dźviery možna było adkryć tolki znutry.

Kali samalot praciahvaŭ tracić vyšyniu, dźviery raptam adčynilisia. Niekalki izrailskich pasažyraŭ zmahli abiasškodzić druhoha piłota, jaki napaŭ na kapitana z nažom i, pavodle śviedčańniaŭ vidavočcaŭ, sprabavaŭ paškodzić panel kiravańnia samalotam.

Paśla hetaha pasažyry razam ź piłotam, jaki znachodziŭsia na borcie, zdoleli stabilizavać samalot i pasadzić jaho ŭ aeraporcie Tabuka na paŭnočnym zachadzie Saudaŭskaj Aravii. Paranienaha Mačchara spačatku dastavili ŭ balnicu Tabuka, a zatym sanitarnym rejsam pieravieźli ŭ Abu-Dabi.

Pasažyr Janiŭ Chajut, jaki pieršym trapiŭ u kabinu, raskazaŭ, što, kali jon zachodziŭ, jamu zdałosia, što jon adsunuŭ dźviaryma kapitana, jaki lažaŭ na padłozie. Paśla hetaha stała zrazumieła, što mienavita paranieny piłot, vierahodna, zdoleŭ daciahnucca da knopki razbłakavańnia dźviarej.

Izrailskija ŭłady nazyvajuć toje, što adbyłosia, sprobaj zachopu samalota z metaj jaho krušeńnia. Napadnik, jaki akazaŭsia hramadzianinam i ŭradžencam Amana, znachodzicca pad śledstvam.

Kapitan Śmit Mačchar vyras u Mumbai, dzie dahetul žyvuć jaho baćki. Jon maje kala 15 hadoŭ vopytu ŭ avijacyi i nalotaŭ amal 9750 hadzin, bolš za 6400 ź jakich — u jakaści kamandzira pavietranaha sudna.

U avijacyju Mačchar pryjšoŭ nie adrazu. Paśla škoły jon vyvučaŭ technałohiju tekstylnaj vytvorčaści, płanujučy praciahnuć siamiejny biznes, a zatym vyvučaŭ mieniedžmient u instytucie ŭ Mumbai. Prykładna ŭ 19 hadoŭ jon naviedaŭ avijacyjny sieminar i zacikaviŭsia palotami.

Paźniej Mačchar prajšoŭ padrychtoŭku ŭ Novaj Ziełandyi i pačaŭ pracavać u indyjskaj avijakampanii SpiceJet. Tam jon staŭ kapitanam-instruktaram, jaki zajmaŭsia padrychtoŭkaj maładych piłotaŭ. U SpiceJet jon pracavaŭ 11 hadoŭ, a ŭ 2022 hodzie pierajšoŭ u Flydubai.

Kamientary da artykuła